Almaniyada Darknet-də fəaliyyət göstərən nəhəng pedofiliya şəbəkəsi ifşa olundu
Almaniyada illərlə aparılan araşdırmalardan sonra Darknet-də fəaliyyət göstərən nəhəng bir pedofiliya platforması ifşa edilərək bağlanıb. Avropa Polis Təşkilatı (Europol) bu platformanı dünyanın ən böyük pedofiliya şəbəkələrindən biri kimi qiymətləndirib.
Bavyera Əyalətinin Cinayət Təhqiqat İdarəsi və Bamberg Baş Prokurorluğunun yaydığı məlumata görə, platformanın 1 milyon 800 min istifadəçisi olub və istifadəçilərə 91 mindən çox video təqdim edilib. Bu isə hər saatda təxminən 3,5 video yükləndiyi anlamına gəlir.
Əməliyyata Almaniya ilə yanaşı, Hollandiya və İsveçrə polisi də qatılıb. 31 ölkədə aparılan əməliyyatlar nəticəsində təxminən 1.400 şübhəli şəxs müəyyən edilib. Təkcə Almaniyada 103 nəfər barəsində istintaq başladılıb.
Europol əməliyyatın koordinasiyasını öz üzərinə götürüb. Platformanın artıq fəaliyyətinin dayandırıldığı bildirilsə də, onu idarə edən şəxslərin kimliyi hələlik müəyyən edilməyib.
Darknet nədir?
Darknet – adi internet brauzerləri ilə daxil olmaq mümkün olmayan, xüsusi proqram təminatı ilə girilən gizli internet şəbəkəsidir. İstifadəçilər burada şəxsiyyətlərini gizli saxlayaraq anonim şəkildə fəaliyyət göstərə bilirlər. Ən çox Tor kimi xüsusi sistemlərlə daxil olunur. Darknet bəzən məxfi kommunikasiya və şəxsi məlumatların qorunması üçün istifadə olunsa da, tez-tez qanunsuz fəaliyyətlər üçün platforma rolunu oynayır.
