Xiaomi tərəfindən dəstəklənən ağıllı məişət texnikası istehsalçısı Dreame Technology 2027-ci ildə Honq Konq Birjasında IPO keçirməyi nəzərdən keçirir. Məlumata görə, ilkin kütləvi təklif nəticəsində şirkət bir neçə yüz milyon ABŞ dolları cəlb edə bilər, lakin yerləşdirmənin həcmi və vaxtı hələ dəqiqləşməyib.
İctimai hesablamalara əsasən, Dreame-in 2023-cü ildə gəliri 8 milyard yuan (təxminən 1,18 milyard ABŞ dolları) təşkil edib. Şirkətin təsisçisi isə gəlirlərin 10 milyard yuanı (1,48 milyard ABŞ dolları) ötə biləcəyini bildirib.
Dreame 2017-ci ildə Xiaomi ekosisteminə qoşulub və Xiaomi Group şirkətin C seriyası investisiya mərhələsində investorlar arasında yer alıb.
2025-ci ilin birinci rübündə qlobal robot tozsoran bazarında Dreame satış həcminə görə 11,3% bazar payına sahib olub. Şirkət bu göstərici ilə bazarda üçüncü yerdə qərarlaşıb. İlk iki pillədə isə Roborock və Ecovacs şirkətləri yer alıb.
Dreame-in mümkün IPO-su Honq Konq bazarında son illərdə müşahidə olunan canlanma fonunda baş verə bilər. Belə ki, 2025-ci ildə Honq Konqda IPO-lar vasitəsilə 36 milyard ABŞ dollarından çox vəsait cəlb olunub. Bununla yanaşı, yeni listinq olunan şirkətlərin səhmləri ümumilikdə gözlənilən performansı göstərə bilməyib.
Ekspertlər hesab edirlər ki, Dreame-in mümkün listinqi materik Çindən olan şirkətlərin kapital bazarlarına çıxış üçün Honq Konqa yönəlməsi tendensiyasına da uyğun gəlir.
