IT Park Özbəkistan Azərbaycanın oyun sənayesində tanınmış Gamepons şirkətinin həmtəsisçisi və CEO-su Vüsal Kərimli ilə görüş keçirib. Görüşdə regional oyun icmaları arasında əlaqələrin gücləndirilməsi və Turkic Game Jam adlı yeni regional oyun hackathon brendinin yaradılması məqsədilə strateji əməkdaşlığın qurulması müzakirə edilib.
Gamepons, Azərbaycanda oyun inkişafı sahəsində xüsusi təhsil proqramları, seminarlar, təlimlər və mentorluq imkanları təqdim etməklə tanınır. Şirkət, yeni oyun startaplarının yaradılmasını dəstəkləməklə və yerli oyun icmasını gücləndirməklə Azərbaycanın qlobal oyun sənayesində innovasiya və yaradıcılıq mərkəzi kimi mövqeyini möhkəmləndirir.
Görüş zamanı IT Park IT Park Özbəkistanın Turkic Game Jam təşəbbüsündə iştirak formatları, Mərkəzi Asiya üzrə oyun inkişaf etdiricilərini birləşdirmək və onların peşəkar inkişafını stimullaşdırmaq məqsədi müzakirə olunub. Bundan əlavə, Gamepons tərəfindən həyata keçirilən layihələr vasitəsilə Özbəkistanın oyun inkişafı sənayesini inkişaf etdirmək yolları, o cümlədən startap dəstəyi, təhsil proqramları və beynəlxalq əməkdaşlıq üçün əlverişli mühitin yaradılması ətrafında fikir mübadiləsi aparılıb.
Tech.az Mediaya açıqlamasında Gamepons şirkətinin həmtəsisçisi və direktoru Vüsal Kərimli: “Türk dövlətlərində böyük potensial görürük. Özbəkistan ekosisteminin son illərdəki inkişafını xüsusi qeyd etmək istəyirəm. IT Park Özbəkistan ilə görüşümüzdə də bunun bir daha şahidi oldum. IT Park Özbəkistan ilə artıq iki istiqamətdə əməkdaşlıqda razılığa gəlmişik: Turkic Game Jam tədbirinin keçirilməsində və Özbəkistan oyun ekosisteminin inkişafında dəstək. Gamepons şikrəti olaraq Özbəkistan ekosisteminin inkişafı üçün birlikdə çalışacağıq. Güclərimizin birləşməsi hər iki tərəf üçün əhəmiyyətli addımdır. Böyük uğur və nailiyyətlər əldə edəcəyimizə inanıram.” sözlərini deyib.
Tərəflər, Mərkəzi Asiya regionunda GameDev startaplarının təşviqi üçün birgə səylərin vacibliyini vurğulayıb və bilik mübadiləsi ilə peşəkar inkişafı asanlaşdıran platformaların yaradılmasını müzakirə ediblər. Görüş, layihədə IT Park-ın iştirakının ilkin addımlarını müəyyənləşdirmək və regiondakı oyun icmalarını inkişaf etdirmək üçün uzunmüddətli strategiya hazırlamaq məqsədi ilə yekunlaşıb.
