Google ABŞ-ın Kaliforniya və Florida ştatlarında milyonlarla ağcaqanadın təbiətə buraxılması üçün icazə almağa çalışır. Məqsəd insanlara daha çox ağcaqanad yaratmaq deyil, xəstəlik yayan növlərin sayını azaltmaqdır.
Şirkətin təqdim etdiyi müraciətə əsasən, Wolbachia bakteriyası daşıyan erkək Culex quinquefasciatus ağcaqanadları buraxılacaq. Kaliforniyada iki il ərzində hər il 16 milyona qədər ağcaqanadın təbiətə buraxılması planlaşdırılır. Eyni həcmdə layihənin Floridada da həyata keçirilməsi nəzərdə tutulur.
Mütəxəssislərin sözlərinə görə, yalnız erkək ağcaqanadlar istifadə olunacaq və onlar insanları sancmır. Bu ağcaqanadlar vəhşi dişilərlə cütləşdikdən sonra bakteriya sağlam nəslin yaranmasının qarşısını alır və nəticədə populyasiya tədricən azalır.
Layihə Qərbi Nil virusu və digər ağcaqanad mənşəli xəstəliklərlə mübarizəyə yönəlib. Bununla belə, proqramın həyata keçirilməsi üçün ABŞ tənzimləyici qurumlarının təsdiqi tələb olunur.
