Google-un çoxdan gözlənilən I/O 2023 konfransı dünən baş tutub. Tədbirdə bir çox yeni məhsullar təqdim edilib. Təqdim olunan məhsullar arasında Google Pixel 7a modeli də var.
Google Pixel 7a - 6,1 düymlük 90 Hz yeniləmə sürətini təklif edən OLED paneli ilə təqdim olunub. Bundan əlavə, telefonun çərçivələri digər Pixel seriyalı telefonlara nisbətən daha kiçikdir. Smartfon Google-un yeni Tensor G2 prosessorundan istifadə edəcək. Belə ki, Pixel 7a, Qualcomm-un WCN6740 adlı Wi-Fi/Bluetooth ilə Google Tensor çipindən istifadə edən ilk cihaz olacaq. Əvvəllər isə Google Pixel 6 seriyası və Pixel 7 kimi cihazlar üçün Broadcom çiplərinə üstünlük verirdi. Bundan əlavə, modeldə 8 GB LPDDR5 RAM və 128 GB UFS 3.1 daxili yaddaş seçimləri var.
Cihaz 64 meqapiksellik əsas və 13 meqapiksellik ultra geniş bucaqlı sensordan ibarət ikili kameraya malikdir. Ön tərəfdə 13 meqapiksellik ön kamerası var. 4,385 mAh batareyası olan smartfon Android 13 əməliyyat sistemi ilə işləyir.
Google Pixel 7a (8GB/128GB) versiyasının 499 dollardan başlayan qiymətlərlə satışa çıxarılacağı da qeyd olunub.
