Hindistan hökuməti Meta şirkətindən WhatsApp tətbiqində istifadəyə verilməsi planlaşdırılan istifadəçi adı (username) funksiyasının ölkədə tətbiqini müvəqqəti dayandırmağı və üç gün ərzində bu yeniliklə bağlı ətraflı izahat təqdim etməyi tələb edib. Rəsmilər hesab edirlər ki, yeni funksiya saxta profillərin yaradılması, kimliyə bürünmə və dələduzluq risklərini artıra bilər.
İlin sonunadək istifadəyə verilməsi gözlənilən yenilik sayəsində istifadəçilər telefon nömrələrini paylaşmadan bir-biri ilə əlaqə saxlaya biləcəklər. Meta bildirib ki, WhatsApp-ın Facebook və Instagram hesabları ilə Accounts Center vasitəsilə əlaqələndirilməsi könüllü olaraq qalacaq. Şirkətin sözlərinə görə, mövcud Facebook və Instagram istifadəçi adları sahibləri üçün qorunacaq, tanınmış şəxslərə, dövlət qurumlarına və təsdiqlənmiş Meta hesablarına məxsus istifadəçi adları isə xüsusi mühafizə altında olacaq.
Bununla yanaşı, yeni funksiyanın bizneslərin müştərilər tərəfindən daha asan tapılmasına da xidmət edəcəyi bildirilir. Lakin istifadəçilər və mütəxəssislər məlumat mübadiləsi və platformalararası inteqrasiya ilə bağlı narahatlıqlarını ifadə edirlər. Meta isə istifadəçi adlarının Accounts Center-in məlumat paylaşımı prinsiplərini dəyişməyəcəyini vurğulayıb.
