İlon Mask sosial platforması X üçün yeni maliyyə xidməti - X Money üzərində işləyir. Bloomberg-in məlumatına görə, bu xidmət yaxın vaxtlarda istifadəyə verilə bilər.
Məlumata əsasən, X Money ABŞ-da aprel ayının sonuna qədər istifadəyə təqdim olunacaq. Platforma istifadəçilərə komissiyasız pul köçürmələri, bəzi alış-verişlərdə 3% keşbek və ən diqqətçəkən xüsusiyyət kimi - əmanətlərə 6% faiz təklif edəcək. Bu göstərici ABŞ bank sektorunda nadir hallarda rast gəlinir.
Xidmət artıq ABŞ-da məhdud istifadəçi qrupu üzərində sınaqdan keçirilib. Əlavə imkanlar arasında şəxsi maliyyəni idarə edən süni intellekt “konsyerj” və istifadəçinin X hesabı ilə əlaqəli fərdi identifikasiyaya malik metal Visa kartı da yer alır.
Bununla belə, layihənin qarşısında müəyyən maneələr var. X Money hələ bəzi ştatlarda, o cümlədən Nyu-Yorkda lazımi lisenziyaları əldə etməyib. ABŞ qanunvericiləri isə vətəndaşların maliyyə vəsaitlərini Mask kimi qeyri-adi biznes liderinə etibar etməyin nə dərəcədə düzgün olduğu ilə bağlı tərəddüd edir.
Qeyd edək ki, Mask bu sahədə yeni deyil — o, vaxtilə PayPal platformasının formalaşmasında iştirak edib. Hazırda X sosial şəbəkəsinin aylıq 600 milyon istifadəçisi var və bu da X Money üçün geniş potensial müştəri bazası yaradır. Bundan əlavə, platforma kontent istehsalçılarını ödənişlər üçün Stripe əvəzinə məhz X Money istifadə etməyə təşviq edəcək.
