ABŞ-nin Keurig Dr Pepper (KDP) şirkəti, Niderlandın qəhvə və çay istehsalçısı JDE Peet’s-i 18,4 milyard dollara satın alır. Reuters-in məlumatına görə, bu məbləğ razılaşmanın elan edildiyi tarixə JDE Peet’s-in bazar dəyərindən təxminən 20% daha yüksəkdir.
Bu xəbərdən dərhal sonra, Jacobs, Tassimo və Douwe Egberts kimi məşhur brendlərə sahib olan JDE Peet’s-in səhmləri 25 avqust 2025-ci ildə 17,2% bahalaşaraq 31,1 avroya yüksəlib. Sövdələşmənin 2026-cı ilin ilk yarısında tamamlanması gözlənilir.
Mütəxəssislərin fikrincə, bu, qlobal qəhvə sənayesində son illərin ən böyük əməliyyatlarından biridir. Qəhvə istehlakının artması və onlayn satışların genişlənməsi, böyük şirkətlər arasında bazarda üstünlük qazanmaq uğrunda mübarizəni daha da gücləndirir.
Satınalmadan sonra KDP-nin fəaliyyəti iki əsas istiqamətə bölünəcək:
- Global Coffee Co. dünya qəhvə bazarına fokuslanacaq.
- Beverage Co. isə Şimali Amerikadakı sərinləşdirici içkilər bazarına diqqət ayıracaq.
Hər iki struktur ABŞ-də qeydiyyata alınacaq. Bu birləşmə KDP-nin qəhvə bazarındakı payını əhəmiyyətli dərəcədə artıracaq və onu Nestlé və Starbucks kimi nəhəng rəqiblərinə daha da yaxınlaşdıracaq.
Qeyd edək ki, Keurig Dr Pepper 2018-ci ildə Keurig Green Mountain və Dr Pepper Snapple şirkətlərinin birləşməsi nəticəsində yaranıb və hazırda 7 Up və Dr Pepper kimi məşhur brendlərin sahibidir. Şirkət bu satınalma ilə Avropa və digər beynəlxalq bazarlarda da mövqeyini gücləndirməyi hədəfləyir.
