Süni intellekt dünyasında standartları yenidən müəyyən edən NVIDIA, Rubin CPX adlı yeni çipini tanıtdı. Xüsusilə milyonlarla "token" səviyyəsində proqram kodlaşdırması və generativ video istehsalı üçün nəzərdə tutulan bu çip, sürət və məhsuldarlıq baxımından inqilab yaratmağı hədəfləyir.
Ənənəvi GPU-lardan fərqli olaraq, Rubin CPX video kodlaşdırma, deşifrə və nəticə çıxarma proseslərini tək bir çipdə birləşdirir. Bu, uzun video məzmunlarının işlənməsini, inkişaf etmiş video axtarışını və yüksək keyfiyyətli generativ video istehsalını mümkün edir.
Yeni NVIDIA Vera Rubin NVL144 CPX platforması bir server rəfində 8 "exaflop" süni intellekt emal gücü və 100 terabayt sürətli yaddaş təklif edir. Bu da onu mövcud NVIDIA GB300 NVL72 sistemlərindən təxminən 7,5 dəfə daha güclü edir. Çipin 2026-cı ilin sonuna qədər bazara çıxarılması planlaşdırılır.
NVIDIA-nın mövcud "Blackwell" arxitekturasını əvəz edəcək yeni nəsil "Rubin" arxitekturası əsasında qurulan Rubin CPX, artıq "Cursor", "Runway" və "Magic" kimi süni intellekt şirkətləri tərəfindən sınaqdan keçirilir.
NVIDIA-nın CEO-su Censen Huanq bu barədə belə dedi: “Vera Rubin platforması süni intellekt hesablamalarında yeni bir sərhəd açacaq. Əgər RTX qrafiklərdə inqilab yaratdısa, Rubin CPX də eyni anda milyonlarla "token" üzərində düşünə bilən ilk CUDA GPU olacaq”.
