Google-un süni intellekt platforması Gemini artıq rəsmi olaraq Azərbaycan dilində istifadəçilərə təqdim olunub. Bu yenilik Gemini 3 erasının – şirkətin indiyədək ən güclü və inkişaf etmiş süni intellekt nəslinin – qlobal istifadəyə verilməsi ilə eyni vaxta təsadüf edir.
Lokallaşdırılmış interfeys artıq veb versiyada aktivdir. Platforma Android və iOS cihazlarında tam dəstəklənir. Həmçinin real vaxt rejimində danışıq imkanı yaradan Gemini Live funksiyası da Azərbaycan dilində istifadəyə verilib.
Bundan əlavə, istifadəçilər üçün Nano Banana və Veo adlı yeni kreativ alətlər də təqdim olunub. Təhsil və məhsuldarlığı artırmaq məqsədilə üç əsas funksiya Azərbaycan dilində istifadəyə açılıb: Canvas, Deep Research və Guided Learning.
Canvas yazı və proqramlaşdırma üçün xüsusi iş mühiti təqdim edərək istifadəçilərə mürəkkəb layihələr üzərində Gemini ilə birgə işləməyə imkan verir. Deep Research müxtəlif mənbələrdən məlumatları təhlil edərək geniş hesabatlar hazırlayır. Guided Learning isə interaktiv izahlar və testlər vasitəsilə Gemini-ni fərdi repetitor funksiyasına çevirir.
