Cənubi Koreyada rüşvət verdiyinə görə həbs edilən və daha sonra əfv olunan “Samsung Electronics”in İdarə Heyətinin sədri Li Çje Yon şirkətdə yenidən öz vəzifəsinə qayıdıb.
Samsung şirkətinin vitse-prezidenti Li bürokratlara 16 milyon avro rüşvət verməkdə ittiham olunurdu.
Li ilk dəfə 2017-ci ildə 5 il həbs cəzasına məhkum edilmiş, lakin 2018-ci ilin fevralında məhkəmənin apellyasiya şikayətinə baxması ilə sübut olunmuş rüşvətin miqdarı azaldılaraq, 5 illik həbs cəzası şərti cəza ilə əvəz edilmişdi. 1991-ci ildən Samsung-da müxtəlif vəzifələrdə çalışan Li 2021-ci ildə yenidən 2,5 il həbs cəzasına məhkum edilib və 13 avqust 2021-ci ildə şərti azadlığa buraxılıb.
Prezident Yoon Suk-yeol 15 avqust Milli Müstəqillik Günü münasibətilə Li də daxil olmaqla, 1691 məhbusu əfv edib. Digər tərəfdən, Li 2014-cü ildən bu yana Samsung-un yeganə rəhbəridir, baxmayaraq ki, bu barədə rəsmi məlumat verilmir. Ona görə də yeni qərar əslində simvolik xarakter daşıyır.
