Airbnb çərşənbə axşamı “Reserve Now, Pay Later” (“İndi rezerv et, sonra ödə”) funksiyasını qlobal miqyasda istifadəyə verdiyini açıqlayıb. Yeni imkan istifadəçilərə rezervasiyanı dərhal ödəniş etmədən təsdiqləməyə şərait yaradır və plan dəyişərsə, əvvəlcədən vəsait itirmədən bronu ləğv etməyə imkan verir.
Şirkət bu funksiyanı ötən il ABŞ-da daxili səyahətlər üçün istifadəyə vermişdi. Airbnb bildirib ki, “flexible” (çevik) və ya “moderate” (orta) ləğv siyasəti tətbiq olunan elanlar bu seçim üçün uyğundur. Bu halda istifadəçidən ödəniş rezervasiya zamanı deyil, qeydiyyat (check-in) tarixinə yaxın tutulur.
Model e-ticarətdə populyarlaşan “indi al, sonra ödə” mexanizminə bənzəyir və bahalı səyahət xərclərini daha əlçatan edir. Şirkətin məlumatına görə, funksiyanın istifadəyə verilməsindən sonra uyğun rezervasiyaların 70%-i bu seçimdən yararlanıb.
Airbnb-in 2025-ci ilin IV rübü üzrə maliyyə hesabatı zamanı bildirilib ki, yeni funksiya həmin dövrdə bron edilən gecələrin sayının artmasına töhfə verib. Şirkətin maliyyə direktoru Elli Mertz qeyd edib ki, bu imkan xüsusilə dörd və daha çox yataq otağı olan böyük evlərə marağı artırıb və orta gündəlik qiymətin yüksəlməsinə təsir göstərib.
Bununla yanaşı, ümumi ləğv göstəricisi IV rübdə 16%-dən 17%-ə yüksəlib. Bu artım əsasən əvvəlcədən rezervasiya edib sonradan ödəmə seçimini edən istifadəçilər arasında daha yüksək olub. Lakin şirkət bunu platformadakı ümumi ləğvlərlə müqayisədə əhəmiyyətli artım hesab etmir.
Airbnb ötən il Londonda yerləşən Focaldata şirkəti ilə birgə ABŞ səyahətçiləri arasında sorğu keçirib. Respondentlərin 60%-i rezervasiya zamanı çevik ödəniş imkanının vacib olduğunu, 55%-i isə belə seçimdən istifadə edəcəyini bildirib.
Qeyd edək ki, Airbnb ödənişi sonradan etmə modellərini bir neçə ildir sınaqdan keçirir. Şirkət 2018-ci ildə rezervasiya zamanı məbləğin 20% və ya 50%-ni ödəyib qalan hissəni daha sonra tamamlamağa imkan verən məhsul təqdim etmişdi. 2023-cü ildə isə Airbnb fintex şirkəti Klarna ilə əməkdaşlığa başlayaraq istifadəçilərə ödənişi altı həftə ərzində dörd hissəyə bölmək imkanı yaratmışdı.
