Rusiyanın ən böyük onlayn ticarət platformalarından biri olan Ozon istifadəçilərə məhsul seçimini asanlaşdırmaq üçün yeni süni intellekt (Sİ) köməkçisini pilot rejimdə istifadəyə verib. Hazırda funksiya məhdud sayda istifadəçi üçün aktivdir və əsasən hansı məhsulu alacağına qərar verməyən müştərilərə kömək etməyi hədəfləyir.
Yeni Sİ köməkçisi Ozon-un anonimləşdirilmiş məlumatları əsasında çalışır. Sistem istifadəçilərin axtarış sorğularını, alış tarixçəsini, məhsul rəylərini və cari qiymətləri analiz edərək fərdiləşdirilmiş tövsiyələr təqdim edir.
İstifadəçilər xüsusi Sİ rejiminə keçərək çat vasitəsilə köməkçi ilə ünsiyyət qura bilirlər. Süni intellekt büdcə, məhsulun xüsusiyyətləri və istifadə məqsədi ilə bağlı suallar verir, daha sonra isə qiymət, çatdırılma müddəti, istifadəçi reytinqi və rəyləri nəzərə alaraq ən uyğun məhsulları təklif edir.
Qeyd edək ki, bir müddət əvvəl Ukraynanın həyata keçirdiyi pilotsuz uçuş aparatı hücumları nəticəsində Ozon-un Rusiyadakı bəzi logistika və anbar obyektləri zərər görmüş, fəaliyyətində müvəqqəti fasilələr yaranmışdı. Buna baxmayaraq, şirkət rəqəmsal xidmətlərini genişləndirməyə və süni intellekt həllərinə investisiya etməyə davam edir.
