Apple Hindistanda bərpa olunan enerji layihələrinin genişləndirilməsi üçün yeni investisiya planını açıqlayıb. Şirkət mayın 7-də bildirib ki, Hindistanın enerji şirkəti CleanMax ilə əməkdaşlıq çərçivəsində ilkin mərhələdə 1 milyard rupi, yəni təxminən 10,5 milyon dollar sərmayə yatıracaq.
Layihə çərçivəsində Hindistanda 150 meqavatdan artıq yeni bərpa olunan enerji gücünün yaradılması nəzərdə tutulur. Apple daha əvvəl də CleanMax ilə birlikdə ofisləri və pərakəndə mağazalarını enerji ilə təmin edən damüstü günəş enerjisi layihələrində əməkdaşlıq edib.
Şirkət həmçinin WWF-India ilə birlikdə tullantıların idarə olunması və təkrar emal layihələrini dəstəklədiyini açıqlayıb. Bununla yanaşı, Apple təsir investoru Acumen ilə tərəfdaşlıq çərçivəsində yaşıl texnologiyalar sahəsində fəaliyyət göstərən altı erkən mərhələ startapını maliyyələşdirir.
