Rəqəmsal infrastruktur təminatçısı Applied Digital süni intellekt (Sİ) sahəsində böyük addım ataraq ABŞ-da yerləşən iri bulud xidmətləri provayderi ilə 5 milyard dollarlıq 15 illik icarə müqaviləsi imzalayıb.
Müqavilə Şimali Dakota ştatında tikilməkdə olan “Polaris Forge 2” adlı məlumat mərkəzində 200 meqavatt (MV) gücündə İT tutumunun icarəsini nəzərdə tutur.
Yeni mərkəz süni intellekt və yüksək performanslı hesablama üçün xüsusi olaraq layihələndirilib. Bu, məlumat mərkəzi infrastrukturuna olan tələbatın süni intellektin inkişafı ilə necə sürətlə artdığını göstərir.
Xəbərin yayılmasından sonra “Applied Digital”ın səhmləri artım göstərib, bu da investorların şirkətin Sİ infrastrukturu bazarındakı mövqeyinə inamını əks etdirib.
“Polaris Forge 2” mərkəzinin ilk mərhələsinin 2026-cı ildə istifadəyə verilməsi, tam gücü ilə işləməsinin isə 2027-ci ildə planlaşdırılır. Bu layihə “Applied Digital”ı ABŞ-da süni intellekt infrastrukturu sahəsində aparıcı şirkətlərdən birinə çevirəcək.
