Son günlər sosial mediada süni intellekt alətləri ilə yaradılmış maraqlı vizual işlər trendə çevrilib. Xüsusilə “OpenAI”ın təqdim etdiyi və yaradıcıların özlərini fəaliyyət fiquru (action figure) kimi təsvir etməsini istəyən prompt böyük marağa səbəb olub. Promptun məzmunu belədir: “Məni real həyatda fəaliyyət fiquru kimi təsvir et. Məni tanıdığın qədər dəqiq ol və qablaşdırmanın içində məni ifadə edən bir neçə maraqlı detal əlavə et.”
OpenAI bu çağırışa cavab olaraq dünyanın müxtəlif yerlərindən olan ən yaradıcı işləri öz rəsmi səhifəsində paylaşmağa başlayıb. Bu paylaşımlar arasında Azərbaycandan olan məzmun yaradıcısı Nəzrin Dadaşovanın işi də yer alıb.
Nəzrin Dadaşova məşhur “Məhəllə” filmindəki Qüdrət obrazını fəaliyyət fiquru şəklində dizayn edərək maraqlı vizual təqdimat hazırlayıb. Onun işi beynəlxalq yaradıcılar arasında seçilərək OpenAI tərəfindən paylaşılıb və qlobal auditoriyaya təqdim olunub.
Bu uğur Azərbaycanın gənc yaradıcılarının beynəlxalq səviyyədə tanınmasında önəmli bir addım kimi qiymətləndirilir.
