Birləşmiş Ərəb Əmirlikləri (BƏƏ) Körfəz regionunda süni intellekt sahəsində artan rəqabət fonunda ərəb dili üzrə yeni süni intellekt modelini – “Falcon Arabic” adlı texnologiyanı təqdim edib.
Ölkənin texnologiya və innovasiya strategiyasına rəhbərlik edən Abu Dhabi Advanced Technology Research Council (ATRC) tərəfindən hazırlanmış bu model, ərəb dilinin bütün dialekt və linqvistik müxtəlifliyini əhatə edən yüksək keyfiyyətli, orijinal (tərcümə olunmamış) məlumat bazası əsasında qurulub.
ATRC-nin baş katibi Fəysal əl-Bənnayi bildirib ki, bu model öz ölçüsündən 10 dəfə böyük olan modellərlə rəqabət apara bilir və daha az hesablama gücü və texniki bilik tələb etdiyi üçün süni intellektdən istifadənin daha geniş kütlələr üçün əlçatan olmasına imkan yaradır:
“Bu gün süni intellektdə liderlik yalnız ölçü ilə ölçülmür. Əsas məsələ güclü alətləri funksional, istifadəyə yararlı və ümumi istifadəyə açıq hala gətirməkdir.”
Yeni təqdim olunan Falcon H1 modeli də performans baxımından Meta və Alibaba kimi texnoloji nəhənglərin sistemlərini geridə qoyaraq, inkişaf etmiş modelləri daha səmərəli şəkildə işə salmaq üçün optimallaşdırılıb.
Bu inkişaflar, BƏƏ-nin süni intellekt sahəsində qlobal oyunçuya çevrilmək ambisiyalarını bir daha təsdiqləyir. ABŞ ilə sıx əlaqələrindən istifadə edən ölkə, irəlidəki aylarda ABŞ-ın qabaqcıl AI yarımkeçiricilərinə çıxış əldə etməyə hazırlaşır.
Qeyd edək ki, süni intellekt məsələsi keçən həftə ABŞ Prezidenti Donald Trampın Səudiyyə Ərəbistanına səfəri zamanı da mərkəzi mövzulardan biri olub. Səudiyyə Ərəbistanı da özünü ABŞ xaricində AI üçün regional mərkəz kimi təqdim etməyə çalışır. Bu məqsədlə bu ay ərzində süni intellekt texnologiyalarını inkişaf etdirmək və idarə etmək üçün yeni dövlət şirkəti yaradılıb. Şirkət, dünyanın ən güclü multimodal ərəb dili modellərindən birini təqdim etməyi planlaşdırır.
Bu hadisələr Körfəz regionunda süni intellekt texnologiyalarının inkişafı istiqamətində rəqabətin yeni mərhələyə keçdiyini göstərir.
