Çin süni intellekt sahəsində qlobal əməkdaşlığı təşviq edəcək beynəlxalq təşkilat yaratmaq istədiyini bəyan edib. Bu təşəbbüs, ABŞ ilə rəqabət fonunda Pekinin bu transformativ texnologiya sahəsində alternativ lider mövqeyi tutmaq istədiyinin göstəricisi kimi qiymətləndirilir.
Çin Baş Naziri Li Çyan bu açıqlamanı şənbə günü Şanxayda keçirilən Ümumdünya Süni İntellekt Konfransında səsləndirib. O bildirib ki, Çin sürətlə inkişaf edən süni intellekt texnologiyasının qlobal səviyyədə tənzimlənməsində iştirak etmək və öz nailiyyətlərini digər ölkələrlə bölüşmək niyyətindədir.
"Süni intellekt yalnız bir neçə ölkə və şirkətin inhisarına çevrilməməlidir," – deyən Li, ad çəkməsə də, ABŞ-ın Çinin texnoloji inkişafına qarşı tətbiq etdiyi məhdudiyyətlərə işarə edib.
Li Çyan əlavə edib ki, Çin süni intellektdən istifadənin hər bir ölkə və şirkət üçün bərabər hüquqlarla açıq olmasını istəyir və xüsusilə “Qlobal Cənub” ölkələrinə öz təcrübəsini və məhsullarını paylaşmağa hazırdır. “Qlobal Cənub” əsasən inkişaf etməkdə olan və ya aşağı gəlirli ölkələri ifadə edir.
ABŞ və Çin arasında süni intellekt rəqabəti
Vaşinqton isə bu həftə süni intellekt üzrə yeni strategiya sənədi açıqlayaraq, ABŞ texnologiyalarının müttəfiq ölkələrə ixracını genişləndirmək və bu sahədə üstünlüyünü qorumaq niyyətini ifadə edib.
Çinin bu təşəbbüsü süni intellekt üzrə qlobal idarəçiliyin parçalanmış vəziyyətdə olduğunu vurğulayır. Li bildirib ki, ölkələr arasında tənzimləmə prinsipləri və institusional yanaşmalar baxımından ciddi fərqlər mövcuddur. "Daha geniş konsensus əsasında vahid qlobal idarəetmə çərçivəsi formalaşdırılmalıdır," – deyə o qeyd edib.
Təşkilatın qərargahı Şanxayda yerləşə bilər
Çin Xarici İşlər nazirinin müavini Ma Zhaoxu bildirib ki, təşkilatın məqsədi AI sahəsində praqmatik əməkdaşlığı təşviq etmək olacaq və qərargahının Şanxayda yerləşməsi nəzərdən keçirilir.
30-dan çox ölkənin, o cümlədən Rusiya, Cənubi Afrika, Qətər, Cənubi Koreya və Almaniyanın nümayəndələri ilə keçirilən dəyirmi masada Çin, AI üzrə qlobal idarəetmə üçün fəaliyyət planını təqdim edərək, hökumətləri, beynəlxalq təşkilatları və tədqiqat qurumlarını əməkdaşlığa çağırıb.
