Tayvanın Milli Təhlükəsizlik Bürosunun yaydığı hesabatda bildirilir ki, 2025-ci ildə Çindən qaynaqlandığı ehtimal edilən kiberhücumlar 6% artaraq gündəlik orta hesabla 2,6 milyon insidentə çatıb.
Məlumata görə, hücumların ən çox artdığı sahələr enerji, təcili yardım xidmətləri və xəstəxanalar olub. Hesabatda qeyd edilir ki, bəzi kiberhücumlar Çin ordusunun hərbi təlimləri və mühüm siyasi hadisələrlə eyni vaxta təsadüf edib. Bu isə Tayvan hökumətinin və cəmiyyətin əsas funksiyalarını pozmağa və ya iflic etməyə yönəlmiş koordinasiyalı fəaliyyət ehtimalını gücləndirir.
Büronun açıqlamasına əsasən, hücumlar əsasən paylanmış xidmətin dayandırılması (DDoS) və “man-in-the-middle” texnikalarından istifadə etməklə həyata keçirilib. Məqsəd kritik sektorları hədəfə almaq və həssas məlumatları ələ keçirmək olub.
Hesabatda həmçinin Tayvanın yarımkeçirici sənayesini dəstəkləyən elmi-texnoloji parkların, o cümlədən TSMC kimi iri şirkətlərin fəaliyyət göstərdiyi obyektlərin də intensiv şəkildə hədəf alındığı vurğulanır.
Çin hökuməti isə kiberhücumlarda iştirak etdiyinə dair ittihamları rədd edir və bu cür fəaliyyətlərlə əlaqəsinin olmadığını bildirir.
