Çin alimləri bütün tezlikləri dəstəkləyən universal 6G çipi hazırlayıblar. Bu çip 0,5 GHz-dən 115 GHz-ə qədər geniş tezlik aralığında işləyə bilir və saniyədə 100 gigabit sürətinə çatır. Bu isə o deməkdir ki, 50 giqabaytlıq 8K formatlı bir videonu cəmi bir neçə saniyəyə yükləmək mümkün olacaq.
Texnologiya Pekin Universiteti və Honq Konq Şəhər Universitetinin alimləri tərəfindən hazırlanıb. Onların sözlərinə görə, çipin çoxşaxəli olması onu müxtəlif şəbəkələrə uyğunlaşdırmağı asanlaşdırır və kənd yerlərində belə yüksək keyfiyyətli internet təmin edə bilər. Aşağı tezliklər geniş ərazini əhatə etməyə imkan verir, yüksək tezliklər isə sürəti artırır və gecikməni minimuma endirir.
Bəzi ekspertlər bu yeniliyi böyük irəliləyiş kimi dəyərləndirsələr də, hələlik onun geniş yayılmasına ehtiyatla yanaşırlar. Onların fikrincə, bütün tezliklərin eyni vaxtda istifadəsi bəzi hallarda əlaqənin sabitliyini poza bilər.
Ümumilikdə, Çinin yeni çipi gələcəyin 6G texnologiyaları üçün inqilabi addım hesab olunur və internet sürətini tamamilə yeni mərhələyə yüksəltməyi hədəfləyir.
