Facebook, gənc istifadəçiləri cəlb etmək məqsədilə unudulmuş "poke" funksiyasını yenidən gündəmə gətirir. Bu funksiya, illərdir istifadə edilməsə də, şirkət tərəfindən aparılan son araşdırmalar bu xüsusiyyətə marağın artdığını göstərib. Nəticədə, "poke" funksiyası yenidən Facebook təcrübəsinin mərkəzi hissəsinə çevrilməyə çalışılır.
Artıq istifadəçilər dostlarını onların profil səhifəsindəki xüsusi düymə vasitəsilə "poke"laya bilərlər. Göndərilən hər "poke" qarşı tərəfə bildiriş şəklində çatır. Bundan əlavə, istifadəçilər facebook.com/pokes səhifəsində kimlərin onları "poke"ladığını görə və dostları ilə olan "poke" saylarını izləyə bilərlər. Hər "poke"laşmada bu say artır. Bu xüsusiyyət, Snapchat və TikTok kimi platformalarda müşahidə olunan oyunlaşdırma (gamification) elementlərini özündə birləşdirir.
"Poke" saylarının vurğulanması və funksiyanın ön plana çıxarılması, əsasən gənc nəslin sosial media vərdişlərinə uyğunlaşmaq məqsədi daşıyır. İstifadəçilər dostları ilə "poke" saylarını artırdıqca, dostun adının yanında alov emojisi və ya "100" kimi müxtəlif ikonlar görünəcək. Meta-nın verdiyi məlumata görə, bu kiçik dəyişikliklər nəticəsində "poke" istifadəsi bir ay ərzində 13 dəfə artıb.
Facebook-un bu addımı, uzun müddətdir gənc istifadəçilər arasında populyarlığını itirən platformanın bu demoqrafik seqmenti geri qaytarmaq səylərinin bir hissəsidir. "Poke"un məqsədi isə istifadəçilərin öz təxəyyülünə buraxılır; bu, dostun diqqətini çəkmək, flört etmək və ya sadəcə əylənmək üçün istifadə oluna bilər.
