Fransa parlamenti 15 yaşdan kiçik uşaqların sosial şəbəkələrdən istifadəsini qadağan edən qanunu qəbul edib. Bununla da Fransa bu yaş qrupu üçün sosial şəbəkələrə tam qadağa tətbiq edən Avropa İttifaqının ilk ölkəsi olub.
21 iyul tarixində həm Senat, həm də Milli Assambleya tərəfindən təsdiqlənən qanun Prezident Emmanuel Makronun ikinci prezidentlik dövrünün əsas təşəbbüslərindən biri hesab olunur. Makron qərarı uşaqların və yeniyetmələrin müdafiəsi istiqamətində "böyük addım" kimi qiymətləndirib.
Yeni qanun yalnız sosial şəbəkələri əhatə etmir. Eyni zamanda, Fransada liseylərdə (yuxarı siniflərdə) mobil telefonlardan istifadə də qadağan edilir. Əvvəllər bu məhdudiyyət yalnız ibtidai və orta məktəblərə şamil olunurdu.
Qanun dərhal qüvvəyə minməyəcək. Sosial media platformaları əvvəlcə istifadəçilərin yaşını etibarlı şəkildə yoxlamaq üçün texniki sistemlər tətbiq etməlidirlər. Şirkətlər bu məqsədlə istifadə ediləcək texnologiyanı özləri seçə biləcəklər. Variantlardan biri Avropa Komissiyasının təqdim etdiyi yaş təsdiqləmə tətbiqidir.
Qeyd edək ki, Fransa 2023-cü ildə də 15 yaşdan kiçik istifadəçilərin sosial şəbəkələrdə qeydiyyatı üçün valideyn razılığını məcburi edən qanun qəbul etmişdi. Lakin texniki problemlər səbəbindən həmin qanun effektiv tətbiq olunmamışdı.
Yeni qanun cəmiyyətdə müxtəlif reaksiyalar doğurub. Valideynlər və uşaqların internet təhlükəsizliyi ilə məşğul olan təşkilatlar bu addımı dəstəkləyərək sosial şəbəkələrin uşaqların psixologiyasına və təhlükəsizliyinə təsirini əsas gətirirlər. Digər tərəfdən, bəzi siyasətçilər qanunun konstitusiyaya uyğunluğu, anonimlik hüququ və icra mexanizmləri ilə bağlı narahatlıqlarını ifadə ediblər.
