Yaponiya hökumətinin dəstəklədiyi Noetra layihəsi ölkənin süni intellekt və robot texnologiyalarında ABŞ və Çinlə rəqabət aparmaq üçün ən böyük təşəbbüslərindən biri hesab olunur. Layihənin baş direktoru Hironobu Tamba bunu "Yaponiyanın son şansı" adlandırıb.
Noetra ilk il üçün 380 milyard yendən (təxminən 2,33 milyard ABŞ dolları) çox dövlət maliyyəsi alıb. Layihəyə SoftBank, Honda və Sony daxil olmaqla 44 şirkət dəstək verir.
Şirkət artıq yeni nəsil AI infrastrukturunu qurmaq üçün 27 500 ədəd Nvidia Rubin prosessoru sifariş edib. İnfrastrukturun tikintisinə 2027-ci ilin aprelində, istifadəyə verilməsinə isə 2028-ci ilin iyununda başlanılması planlaşdırılır.
Noetra fiziki süni intellekt və robototexnika üçün əsas (foundation) AI modelini hazırlayacaq. Məqsəd Yaponiya şirkətlərinə məlumatlarını xarici platformalardan asılı olmadan idarə edə biləcəkləri etibarlı və təhlükəsiz süni intellekt platforması təqdim etməkdir.
Hazırda ABŞ və Çin süni intellekt sahəsində qlobal liderlik uğrunda mübarizə apararkən, sənaye robotlarının istehsalında dünya liderlərindən olan Yaponiya da texnoloji müstəqilliyini gücləndirməyə çalışır.
Yaponiya hökuməti 2040-cı ilədək istehsalat, gəmiqayırma və digər sənaye sahələrində 10 milyon süni intellekt dəstəkli robotun istifadəyə verilməsini hədəfləyir.
