Android ekosisteminin prezidenti Samir Samatın açıqlamasına görə, Google yaxın gələcəkdə ChromeOS və Android əməliyyat sistemlərini birləşdirərək vahid platforma yaradacaq. Bu məlumat Techradar portalı tərəfindən yayımlanıb.
Samat jurnalistlə MacBook Pro istifadə etməsi barədə söhbət zamanı bildirib ki, Google istifadəçilərin hazırda noutbuklarını necə istifadə etdiyini öyrənmək istəyir, çünki şirkət ChromeOS və Android-i birləşdirməyi planlaşdırır.
Ötən il bu barədə ilkin məlumatlar yayılmış, lakin o vaxt Google-un ChromeOS-u tamamilə Android-ə keçirməyəcəyi, yeni tamamilə fərqli sistem yaratmayacağı bildirilmişdi.
Hazırda Google mobil və masaüstü əməliyyat sistemlərini birləşdirməyə çalışır. Apple şirkətinin iPadOS sistemi də oxşar yanaşmaya malikdir və iOS ilə macOS-un xüsusiyyətlərini bir arada təqdim edir.
Google tərəfindən iki sistemin birləşdirilməsi ilə bağlı digər texniki və rəsmi məlumatlar hələ açıqlanmayıb. Bu addım istifadəçilər üçün daha inteqrasiya olunmuş və çevik təcrübə təmin etmək məqsədi daşıyır.
