HubSpot cəmi 10 ay əvvəl qurulan İsrail startapı XFunnel-i satın aldığını açıqlayıb. Bu, HubSpot-un İsraildəki ilk satınalmasıdır və şirkətin süni intellekt əsaslı marketinq strategiyasını genişləndirməsi kimi qiymətləndirilir.
XFunnel 2025-ci ilin əvvəlində Beeri Amiel və Neri Bluman tərəfindən təsis edilib. Startapın məqsədi süni intellekt dövründə marketinqin necə dəyişdiyini anlamaq və şirkətlərə “cavab mühərrikləri” (Answer Engines) dövrünə uyğun alətlər təqdim etmək idi. Bu alətlər ChatGPT, Claude və Perplexity kimi AI modellərinin istifadəçilərə axtarış nəticələri deyil, birbaşa cavablar təqdim etdiyi yeni mühitdə brendlərin görünürlüğünü qorumağa kömək edir.
HubSpot və XFunnel-in əməkdaşlığı əvvəlcə müştəri münasibəti kimi başlayıb, daha sonra investisiyaya və sonda tam satınalmaya çevrilib. Müqavilənin maliyyə detalları açıqlanmayıb.
Hazırda HubSpot-un bazar dəyəri 26 milyard dollar civarındadır. Şirkət bu addımı özünün yeni “Loop Marketing” təşəbbüsünün bir hissəsi kimi təqdim edir. Bu modelin məqsədi — şirkətlərə süni intellekt platformaları vasitəsilə müştəri cəlb etmək, əlaqə yaratmaq və satış prosesini optimallaşdırmaq üçün innovativ yanaşma təklif etməkdir. HubSpot-un məlumatına görə, AI əsaslı potensial müştəri axtarışı ənənəvi üsullardan 3 dəfə daha effektiv nəticə verir.
HubSpot-un Marketinq bölməsinin vitse-prezidenti Angela DeFranco bildirib:
“Süni intellekt insanların şirkətləri tapma və onlarla əlaqə qurma üsulunu dəyişdirir. Biz müştərilərimiz üçün bu keçidi asanlaşdırmaq istəyirik.”
XFunnel-in həmtəsisçiləri Amiel və Bluman isə qeyd ediblər ki, HubSpot ilə birləşmə “marketinqin gələcəyini birgə formalaşdırmaq” üçün böyük fürsətdir. Onların sözlərinə görə, əsas diqqət Answer Engine Optimization (AEO) — yəni AI cavablarında brendlərin görünməsini təmin edən yeni istiqamətin inkişafına yönələcək.
XFunnel-in inkişafı olduqca sürətli olub: startap cəmi 10 ay əvvəl qurulub, 6 ay sonra ilk müştəriləri ilə işləməyə başlayıb. İndi isə o, HubSpot-un tərkibinə daxil olaraq 270 mindən çox biznesin istifadə etdiyi platformada süni intellekt əsaslı marketinqin daha dərin inteqrasiyasına töhfə verəcək.
