Almaniyanın Zeiss Semiconductor Manufacturing Technology (Zeiss SMT) şirkəti EUV (Extreme Ultraviolet) litoqrafiyası üçün optik komponentlərin istehsalını artırmaq məqsədilə Almaniyada yeni istehsal müəssisəsini istifadəyə verib.
Bu addım yarımkeçirici sənayesi üçün strateji əhəmiyyət daşıyır. Çünki Zeiss SMT hazırda ASML şirkətinin EUV litoqrafiya sistemləri üçün yüksək dəqiqlikli optik komponentlər istehsal edən dünyada yeganə təchizatçıdır. Zeiss-in linzaları, güzgüləri və optik sistemləri olmadan müasir prosessor və çiplərin istehsalında istifadə olunan EUV maşınlarını hazırlamaq mümkün deyil.
Mütəxəssislərin fikrincə, Zeiss-in istehsal gücü uzun müddətdir ASML-in avadanlıq istehsalını məhdudlaşdıran əsas amillərdən biri hesab olunur. Şirkət High-NA EUV sistemləri üçün linzalar, güzgülər və işıqlandırma modulları istehsal edir. Belə proyeksiya sistemlərindən biri 40 mindən çox hissədən ibarətdir, təxminən 12 ton ağırlığındadır və bəzi güzgülərin hazırlanması bir neçə ay çəkir.
İstehsalın genişləndirilməsi üçün ASML tərəfdaşına 1,91 milyard avro kredit və 1,19 milyard avro avans ayırıb. Şirkətlərin məqsədi hər bir EUV litoqrafiya maşınının yığılma müddətini 22 həftədən 15–16 həftəyə endirmək və istehsal həcmini artırmaqdır.
ASML-in Zeiss SMT-dən etdiyi satınalmaların həcmi də ildən-ilə artır. Bu göstərici 2023-cü ildə 3,33 milyard avro, 2024-cü ildə 3,95 milyard avro, 2025-ci ildə isə 4,41 milyard avroya yüksəlib.
