İlon Maskın rəhbərlik etdiyi X platforması, 2025-ci ilin martın 10-da ABŞ-da və bir neçə digər ölkədə minlərlə istifadəçi tərəfindən əlçatmaz olub. Təxminən səkkiz saatlıq dayanmadan sonra Mask, platformanın "böyük kiberhücum" ilə qarşılaşdığını açıqlayıb.
Mask X-də paylaşdığı yazısında "Böyük bir kiberhücumla üzləşirik. Hər gün hücuma məruz qalırıq, amma bu, çox böyük resurslarla həyata keçirilib. Ya böyük və koordinasiyalı bir qrup, ya da bir ölkə bu işə qarışıb" deyib.
Bundan əvvəl, Mask Fox News-la keçirdiyi canlı müsahibədə, X platformasına edilən kiberhücumun IP ünvanlarının Ukrayna bölgəsindən gəldiyini qeyd edib. Hələlik Mask-ın açıqlamalarını dəstəkləyən hər hansı bir sübut olmasa da, onun platformasının kiberhücumlara qarşı həssas olması mümkündür.
Downdetector-in məlumatlarına görə, X, saat 5:30-da (ET) bəzi istifadəçilər üçün əlçatmaz olub və 20,000-dən çox istifadəçi problemdən şikayət edib. Bu problemlər bir saat ərzində həll olunmuş kimi görünsə də, saat 9:30-da yenidən baş verib və 40,000-dən çox istifadəçi şikayət edib. Bəzi istifadəçilər X-ə aralıklı olaraq daxil ola bilsələr də, problemlər saat 13:30-a qədər davam edib.
Böyük platformalar üçün bu cür fasilələr adətən normal olsa da, istifadəçilər üçün heç də rahat olmur.
