İran hökuməti Meta-nın (WhatsApp) mesajlaşma platforması və Google Play üzərindəki qadağanı ləğv edib. Bu addım internet məhdudiyyətlərinin azaldılması istiqamətində ilk addım kimi qiymətləndirilir, İranın dövlət mediası çərşənbə axşamı məlumat yayıb.
İslam Respublikası dünyada internetə çıxışı ən ciddi şəkildə məhdudlaşdıran ölkələrdən biridir. Lakin ABŞ mənşəli sosial media platformaları – Facebook, Twitter və YouTube kimi xidmətlərə qoyulan bloklar texnologiyadan başı çıxan iranlılar tərəfindən virtual özəl şəbəkələr (VPN) vasitəsilə adətən keçilir.
Rəsmi IRNA agentliyinin məlumatına görə, Prezident Məsud Pezeşkianın rəhbərliyi altında keçirilən iclasda “WhatsApp və Google Play kimi populyar xarici platformalara qoyulan məhdudiyyətlərin qaldırılması ilə bağlı müsbət qərar qəbul edilib”.
“İnternet məhdudiyyətlərinin aradan qaldırılması istiqamətində bu gün ilk addım atıldı”, – İranın İnformasiya və Kommunikasiya Texnologiyaları naziri Səttar Həşimi bildirib.
Qeyd edək ki, sosial media platformaları İranda hökumət əleyhinə etirazlarda geniş istifadə olunurdu.
Sentyabr ayında ABŞ hökuməti böyük texnologiya şirkətlərini İranda və digər interneti ciddi şəkildə məhdudlaşdıran ölkələrdə onlayn senzuranı keçmək üçün insanlara dəstək olmağa çağırmışdı.
