İsrail mövqeli “Predatory Sparrow” haktivist qrupu İranın Sepah Bankına kiberhücum etdiyini və bankın məlumatlarını silərək fəaliyyətsiz hala gətirdiyini iddia edib. Qrup öz bəyanatında bildirib ki, bu hücum İran İslam İnqilabı Keşikçiləri Korpusuna (SEPAH) bağlı olan Sepah Bankına qarşı həyata keçirilib. Onların sözlərinə görə, bank beynəlxalq sanksiyaları pozaraq İran xalqının pullarını terrorçu qruplara, ballistik raket proqramlarına və hərbi nüvə layihələrinə yönəldir.
Məlumatı yayımlayan TechCrunch xəbər verir ki, bu hücumun təsdiqlənməsi hələ mümkün olmayıb. Bank Sepah-ın İran üzrə elektron poçt ünvanlarına göndərilən sorğular cavabsız qalıb və mesajlar geri qaytarılıb. Bankın Böyük Britaniya və İtaliyadakı filiallarından isə hələlik heç bir rəsmi açıqlama verilməyib. Hücumu həyata keçirdiyini iddia edən qrup da TechCrunch-un X və Telegram üzərindən ünvanladığı suallara cavab verməyib.
İranın müstəqil xəbər portalı olan Iran International bildirir ki, hücumdan sonra ölkə üzrə bank sistemində geniş pozuntular yaşanıb. Sepah Bankının bəzi filialları müvəqqəti olaraq bağlanıb və müştərilər hesablarına daxil ola bilmədiklərini qeyd ediblər. İsrailin i24NEWS telekanalının jurnalisti Ariel Oseran isə İran bankomatlarında texniki nasazlıq mesajlarının göründüyünü göstərən fotolar paylaşıb.
Bu hadisə İsrail və İran arasında son günlərdə artan hərbi gərginlik fonunda baş verir. İsrail bir neçə gün əvvəl İranın nüvə obyektlərinə, hərbi bazalarına və yüksək vəzifəli hərbçilərinə qarşı hücumlara başlayıb. Bu qarşılıqlı hücumlar nəticəsində bölgədə gərginlik daha da artıb.
Predatory Sparrow qrupunun üzvləri və arxasında hansı qüvvələrin durduğu rəsmi olaraq məlum olmasa da, onların uzun illərdir İranda fəaliyyət göstərən dövlət qurumlarını və infrastruktur obyektlərini hədəfə aldığı bildirilir. Kibertəhlükəsizlik üzrə mütəxəssislər bu qrupun daha əvvəl İranın polad zavoduna və yanacaqdoldurma məntəqələrinə hücumlar həyata keçirdiyini və bu hücumların ölkədə ciddi iqtisadi və sosial pozuntulara səbəb olduğunu bildirirlər.
Google-un kibertəhlükəsizlik bölməsi olan Mandiant şirkətinin baş analitiki Con Hultquist yazır ki, bu qrupun fəaliyyəti yalnız təbliğatdan ibarət deyil və onların real təsir gücünə malik kiberhücumları olub. ABŞ-ın Milli Təhlükəsizlik Agentliyində çalışmış ekspert Rob Joyce da Predatory Sparrow-un keçmiş hücumlarının İranda ciddi nəticələr doğurduğunu vurğulayıb.
