İsrail Müdafiə Qüvvələri 2026-cı ilin əvvəlinədək yüksək rütbəli zabitlər və onların ailələri üçün alınmış təxminən 700 ədəd Çin istehsalı avtomobili istismardan çıxaracaq. Avtomobillərin əksəriyyəti Çinin Chery Automobile Co. Ltd. şirkəti tərəfindən istehsal olunub.
Rəsmi məlumatlara görə, bu qərarın əsas səbəbi kibertəhlükəsizlik riskidir. İsrailin kibermühəndisləri avtomobillərin təhlükəsizlik boşluqlarını aradan qaldırmağa çalışsalar da, bu cəhdlər uğursuz olub. Mütəxəssislər bildirirlər ki, bəzi hərbi obyektlərin məlumat sızması ilə bağlı araşdırmalar nəticəsində şübhələrin Chery avtomobillərinə yönəldiyi ehtimal olunur.
İsrailin bu addımı ABŞ-ın oxşar qərarını izləyir — hazırda Çin markalı minik avtomobilləri ABŞ-da satışda deyil. Bununla belə, BYD, Nio və Xpeng kimi Çin markaları yaxın illərdə elektrik və hibrid modellərlə ABŞ bazarına daxil olmağa hazırlaşır.
Chery avtomobilləri İsrail ordusu tərəfindən 2022-ci ildən etibarən alınmağa başlanmışdı. Onların çoxu Tiggo 8 Pro modelidir və Yaxın Şərq bazarında orta qiyməti təxminən 25 min dollar təşkil edir. Lakin iri həcmdə alınan bu avtomobillərin ordunun ehtiyaclarına görə endirimli qiymətlərlə satıldığı ehtimal olunur.
Ekspertlər hesab edirlər ki, bu addım İsrailin kiberkəşfiyyat sahəsində artan ehtiyatlılığının göstəricisidir və gələcəkdə Çin mənşəli texnologiyaların dövlət və hərbi strukturlarda istifadəsinə daha sərt nəzarət tətbiq edilə bilər.
