İtaliyanın Antimonopoliya İdarəsi (AGCM) bazarda öz dominant mövqeyindən sui-istifadə etdiyi üçün Apple şirkətinə 98,6 milyon avro məbləğində ağır cərimə tətbiq edib. Bu qərara səbəb şirkətin 2021-ci ildən tətbiq etməyə başladığı Tətbiqlərin İzlənmə Şəffaflığı siyasətinin rəqabət qaydalarını pozmasıdır. Tənzimləyici qurum hesab edir ki, Apple bu funksiya vasitəsilə digər tətbiq tərtibatçılarına qarşı ədalətsiz şərtlər qoyaraq onların reklam gəlirlərinə ciddi zərər vurub.
Araşdırmanın nəticələrinə görə, Apple digər şirkətləri öz istifadəçilərindən reklam məqsədli məlumat toplamaq üçün ikiqat razılıq almağa məcbur edir. Bu proses istifadəçilər üçün yorucu olduğundan çox vaxt məlumatların paylaşılmasından imtina edilir və nəticədə rəqib tətbiqlərin gəlirləri kəskin şəkildə azalır. İtaliya rəsmiləri bildirir ki, Apple-ın bu yanaşması məxfiliyin qorunmasından daha çox rəqibləri bazardan sıxışdırmağa və özünün App Store xidmətlərindən gələn qazancları artırmağa xidmət edir. Şirkətin öz tətbiqlərinin isə bu sərt qaydalardan daha asan keçməsi tənzimləyicilər tərəfindən ikili standart kimi qiymətləndirilib.
Apple isə öz növbəsində bu qərarla qəti şəkildə razılaşmadığını və məhkəməyə müraciət edəcəyini bəyan edib. Şirkət rəhbərliyi hesab edir ki, bu siyasət yalnız istifadəçilərin şəxsi məlumatlarını qorumaq məqsədi daşıyır və beynəlxalq məxfilik qurumları tərəfindən dəstəklənir. Buna baxmayaraq, İtaliya tərəfi Apple-ın tək tərəfli qaydalarının iqtisadi tərəfdaşlarına zərər vurduğunu vurğulayaraq cərimənin ödənilməsini tələb edir.
