Louis Vuitton qeyri-qanuni biometrik məlumat toplamaqda ittiham olunur

Louis Vuitton şirkətinin Şimali Amerika bölməsi günəş eynəyi və çərçivələri virtual olaraq sınaqdan keçirməyə imkan verən Virtual Try-On xidməti vasitəsilə müştərilərdən qeyri-qanuni biometrik məlumatları toplamaqda ittiham olunur. Manhattandə açılan iddiaya görə, şirkət istifadəçilərinin həssas biometrik məlumatlarını, o cümlədən tam üz skanını Virtual Sınaq xidməti vasitəsilə onların razılığı olmadan və onlara məlumat verilmədən toplayır. Şikayət biometrik məlumatların icazəsiz toplanması və saxlanmasını qadağan edən və hər pozuntuya görə 1000-5000 ABŞ dolları arasında cərimələr tətbiq edən İllinoys Biometrik Məlumatların Qorunması Qanununa istinad edilib. Bildirilir ki, toplanan məlumatlar kompüter koduna çevrilir və saxlanmaq üçün xarici serverə göndərilir. Louis Vuitton-un Şimali Amerika nümayəndələri vəziyyətlə bağlı sorğuya hələlik rəsmi cavab verməyiblər.