Scale AI 2016-cı ildə yaradılıb və OpenAI-nin ChatGPT kimi qabaqcıl süni intellekt alətlərinin inkişafı üçün vacib olan böyük həcmdə etiketlənmiş və seçilmiş təlim məlumatları təqdim edir.
Məlumatda qeyd olunur ki, hələ yekunlaşmamış bu razılaşma Scale AI-nın hazırkı və keçmiş işçiləri, həmçinin Accel, Index Ventures, Founders Fund və Greenoaks kimi investorlar üçün sərfəlidir.
Razılaşmanın tərkib hissəsi olaraq, Scale AI-nın CEO-su Aleksandr Vang Meta daxilində “superintellekt” laboratoriyasına rəhbərlik edəcək.
Meta CEO-su Mark Zuckerberg şirkətin süni intellekt sahəsində rəqabət qabiliyyətini artırmaq üçün qabaqcıl tədqiqatçıları işə cəlb edir. Şirkət apreldə təqdim etdiyi Llama 4 modelinin performansının gözlənilən səviyyədə olmaması səbəbindən süni intellekt sahəsində geri qalması ilə bağlı yaranan təsəvvürü aradan qaldırmağa çalışır.
Bundan əlavə, Meta-nın Instagram və WhatsApp kimi şirkətləri alması antimonopol qaydalar baxımından da diqqətdədir. The Information-un məlumatına görə, Scale AI ilə razılaşmanın strukturu əlavə tənzimləyici yoxlamaların qarşısını almaq üçün xüsusi hazırlanır.
Scale AI ötən ilin yazında keçirilən maliyyələşdirmə turunda 13,8 milyard dollar dəyərində qiymətləndirilmişdi. Şirkət 2024-cü ildə təxminən 870 milyon dollar gəlir əldə edib və bu ilin sonunda bu rəqəmin 2 milyard dolları keçəcəyi gözlənilir. Həmçinin, şirkətin ötən ilin sonunda balansında 900 milyon dollardan çox nağd pul olduğu bildirilir.
Bu razılaşma Meta-nın süni intellekt sahəsində mövqeyini gücləndirmək və bazarda rəqabət üstünlüyü qazanmaq üçün atdığı mühüm addımlardan biridir
