Nvidia şirkəti ABŞ hökumətinin ixrac məhdudiyyətləri səbəbilə Çindəki mövqeyini qorumaq məqsədilə yeni, daha əlçatan qiymətə sahib süni intellekt prosessoru hazırlayıb. Məlumata əsasən, Blackwell arxitekturasına əsaslanan yeni qrafik prosessor vahidinin (GPU) qiyməti 6,500-8,000 ABŞ dolları arasında dəyişəcək və bu, əvvəlki H20 modelindən (10,000-12,000 dollar) xeyli ucuz olacaq.
Yeni GPU, RTX Pro 6000D server sinifli qrafik prosessoruna əsaslanacaq və daha sadə texnoloji xüsusiyyətlərə malik olacaq. Çipdə yüksək ötürmə qabiliyyətinə malik yaddaş texnologiyası olan HBM əvəzinə GDDR7 yaddaşı istifadə ediləcək və TSMC şirkətinin qabaqcıl CoWoS (Chip-on-Wafer-on-Substrate) paketləmə texnologiyasından imtina ediləcək.
Bu, Nvidia-nın ABŞ-nin ixrac məhdudiyyətlərinə uyğunlaşmaq məqsədilə Çinə üçün hazırladığı artıq üçüncü fərdi GPU modelidir. Çipin istehsalına iyun ayından başlanacağı gözlənilir. Şirkət bu çipi ABŞ hökumətinin təyin etdiyi texniki limitlər daxilində dizayn edib və yeni məhsul üçün hələ rəsmi ad seçilməyib. Çinli analitiklər cihazın 6000D və ya B40 adlanacağını ehtimal edirlər.
Nvidia sözçüsü bildirib ki, şirkət “məhdud seçimləri” qiymətləndirir və yeni məhsul dizaynı üçün hələ ABŞ hökumətindən təsdiq gözlənilir. “Bu təsdiq olmadan Çin bazarında (təxminən 50 milyard dollarlıq məlumat mərkəzi sektoru) fəaliyyətimiz demək olar ki, mümkünsüzdür,” – deyə nümayəndə əlavə edib.
Son maliyyə ilində satışlarının 13%-i Çin bazarından əldə edilən Nvidia, ABŞ-ın ixrac nəzarətləri nəticəsində bu bazarda ciddi bazar payı itirib. Əgər 2022-ci ildən əvvəl Nvidia-nın Çin bazarındakı payı 95% idisə, bu rəqəm hazırda 50%-ə düşüb. Hazırda Nvidia-nın əsas rəqibi Huawei-dir və onun istehsal etdiyi Ascend 910B çipi bazarda rəqabət aparır.
Sinqapurda yerləşən White Oak Capital Partners şirkətinin investisiya direktoru və yarımkeçirici texnologiyalar üzrə mütəxəssis Nori Chiou qeyd edir ki, “Çin istehsalı texnologiyaların, o cümlədən Huawei-nin performans baxımından bir-iki ilə Nvidia-nın aşağı konfiqurasiyalı modellərini keçməsi gözlənilir.” O əlavə edib ki, Nvidia-nın əsas üstünlüyü CUDA proqramlaşdırma platformasındadır. Bu platforma AI tətbiqləri üçün geniş istifadə olunur və mühəndislər arasında populyarlığını qoruyur.
ABŞ-nin aprel ayında H20 modelinə qadağa qoymasından sonra Nvidia bu modelin dəyişdirilmiş versiyasını yaratmaq istəsə də, layihə baş tutmayıb. Şirkət ötən il H20 ilə əlaqəli olaraq 5,5 milyard dollarlıq məhsul ehtiyatını silib və bu modeldən gözlənilən 15 milyard dollarlıq satışdan da imtina edib.
Yeni ixrac qaydalarına əsasən, GPU yaddaş ötürmə genişliyi 1.7-1.8 terabayt/saniyə ilə məhdudlaşdırılıb. H20 modeli bu göstəricidə 4 TB/s performans göstərdiyindən, yeni çipin GDDR7 yaddaşı ilə limiti aşmadan fəaliyyət göstərəcəyi düşünülür.
Nvidia sentyabr ayından etibarən Çin üçün Blackwell arxitekturasına əsaslanan başqa bir çipin istehsalına da başlamağı planlaşdırır. Bu modelin texniki xüsusiyyətləri hələ açıqlanmayıb.
Bu strategiya Nvidia-nın Çindəki bazar mövqeyini qorumaq üçün atdığı son addımlardan biridir və şirkət ABŞ hökuməti ilə texniki balansı qoruyaraq rəqabətə davam etməyə çalışır.
