Nvidia, ABŞ-də istehsal olunmuş ilk Blackwell çip valını (wafer) nümayiş etdirdi. Bu, Nvidia və TSMC-nin birgə əməkdaşlığı ilə, TSMC-nin Arizonadakı yeni zavodunda həyata keçirilib. Sİ çiplərinə olan tələbat sürətlə artdığı bir vaxtda, bu hadisənin əsas əhəmiyyəti ABŞ-nin texnoloji təhlükəsizliyini və daxili istehsal gücünü artırmasıdır.
Nvidia bildirir ki, bu addım iki kritik məqsədə xidmət edir: Birincisi, Tədarük Zəncirinin Təhlükəsizliyi – istehsalın ABŞ-yə köçürülməsi (onshoring) ölkənin çip asılılığını azaldır və tədarük zəncirini daha etibarlı edir. İkincisi isə, Sİ Liderliyi – bu, məlumatları intellektə çevirən ən vacib Sİ texnologiyalarının ABŞ daxilində hazırlanmasına və Amerikalıların bu sahədə liderliyini təmin etməsinə kömək edir.
TSMC-nin Arizona zavodunda yalnız Blackwell deyil, həm də Sİ sistemləri, telekommunikasiya və super-kompüterlər üçün lazım olan ən qabaqcıl çiplər istehsal ediləcək: Bunlara 2, 3 və 4 nanometrlik texnologiyalar, habelə gələcək nəsil A16 çipləri daxildir. Qeyd edək ki, son vaxtlar Sİ-ə olan güclü tələbat səbəbindən Nvidia, AMD və Broadcom kimi çip istehsalçıları ilə texnologiya şirkətləri arasında böyük məlumat mərkəzləri qurmaq üçün milyardlarla dollarlıq müqavilələr bağlanır. Bu tələbat fonunda TSMC-nin özü də rekord qazanc əldə edərək, bu il üçün gəlir proqnozlarını artırıb.
