İnnovasiya və Rəqəmsal İnkişaf Agentliyi (İRİA) və “StrategEast” arasında baş tutan yeni əməkdaşlıq çərçivəsində Azərbaycanın İKT sektorunda inkişafa xidmət edən mühüm layihəyə start verildi. Bu əməkdaşlıq, ölkədə rəqəmsal transformasiyanı dəstəkləmək və İKT sektorunun inkişafına töhfə vermək məqsədilə tərəfdaşların bilik və resurslarını birləşdirərək həyata keçirilir.
Əməkdaşlıq çərçivəsində təqdim olunan “Digital LevelUP” ödənişsiz təlim proqramı texnologiya sahəsində beynəlxalq sertifikatlara sahib yüksək ixtisaslı mütəxəssislər yetişdirməyi hədəfləyir. Proqram çərçivəsində Oracle Universiteti ilə əməkdaşlıq qurularaq yerli İKT sənayesinin inkişafına dəstək veriləcək. Oracle təlimlərindən yararlanan iştirakçılar beynəlxalq sertifikatlı mütəxəssis kimi karyera imkanlarını genişləndirəcək və İT sahəsinin aparıcı kadrlarına çevriləcəklər.
Bu proqram müasir texnologiyaların (bulud həlləri, verilənlər elmi, süni intellekt, DevOps) müəssisələrdə geniş tətbiqi ilə biznesdə çeviklik, effektivlik və innovasiya imkanları yaradır. İştirakçılar bu biliklərlə rəqəmsal transformasiya sahəsində rəqabət üstünlüyü qazana biləcəklər. Dərslər “özü öyrənmə” metodu ilə onlayn formada həyata keçiriləcək. İştirakçılar təlim müddətində mentor dəstəyi ilə təmin olunacaqlar.
Bu sahələrdə inkişaf edən tələbələr “OCI Foundation Associate”, “Oracle Cloud Infrastructure Data Foundations Associate”, “Become an OCI AI Foundation Associate” sertifikat imtahanlarına pulsuz giriş imkanı əldə edəcəklər.
Bu il ərzində keçiriləcək təlim proqramı üzrə hər biri 4 ay olmaqla 3 təlim dalğası təşkil olunacaq. Ümumilikdə, 200-dən çox iştirakçının proqramda iştirakı nəzərdə tutulur və hər dalğada minimum 70 məzunun yetişdirilməsi hədəflənir.
Təlimlərə kompüter elmləri üzrə fundamental biliklərə və ingilis dili bacarığına malik 3-cü və 4-cü kurs bakalavr tələbələri, həmçinin magistrantlar müraciət edə bilərlər.
Qeydiyyat linki: https://education.strategeast.org/
Son qeydiyyat tarixi: 06.12.2024
“Digital LevelUP” proqramı iştirakçılara beynəlxalq standartlar əsasında bacarıqlar qazandırıacaq və Azərbaycanın İT sektorunda rəqabət üstünlüyünü gücləndirəcək.
Qeyd edək ki, “StrategEast” beynəlxalq maliyyə institutları, inkişaf agentlikləri, qlobal texnoloji şirkətlər və dövlət qurumları ilə əməkdaşlıq edən, Avrasiyanın rəqəmsal iqtisadiyyatına dəstək göstərən nüfuzlu təşkilatdır. Bu əməkdaşlıq vasitəsilə proqram iştirakçılarına qlobal standartlara uyğun bilik və təcrübə qazandırılacaq.
