OpenAI 2025-ci ildə əməkdaşlarına hər biri təxminən 1,5 milyon dollar dəyərində səhm əsaslı kompensasiya paketləri təqdim edir. Bu barədə The Wall Street Journal nəşrinin istinad etdiyi maliyyə proqnozlarında qeyd olunub.
Məlumata görə, bu göstərici açıq səhmlər bazarına çıxmazdan əvvəl texnologiya sektorunun əvvəlki nəhəngləri tərəfindən təqdim edilən səhm mükafatlarından xeyli yüksəkdir. Ekspertlər bunu süni intellekt (Sİ) sahəsində istedadlı mütəxəssislər uğrunda artan rəqabətlə əlaqələndirirlər.
Sİ sahəsində aparıcı mövqeyi qorumaq üçün OpenAI və digər texnologiya oyunçuları tədqiqatçı və mühəndisləri cəlb etmək və saxlamaq məqsədilə daha iri həcmli səhm razılaşmaları təklif edirlər. Bununla yanaşı, OpenAI səhm qaydalarında dəyişiklik edərək, əvvəl mövcud olan altı aylıq gözləmə müddətini ləğv edib və bu addımla əmək bazarında rəqabət qabiliyyətini artırmağı hədəfləyir.
