Bu təşəbbüs OpenAI-nin Yaxın Şərqdəki fəaliyyətini əhəmiyyətli dərəcədə genişləndirmək məqsədi daşıyır və razılaşmanın yaxın günlərdə elan olunacağı gözlənilir.
OpenAI ilə BƏƏ arasında əməkdaşlıq əlaqələri artıq bir neçə ildir ki, davam edir. 2023-cü ildə şirkət Əbu-Dabidə yerləşən süni intellekt firması G42 ilə tərəfdaşlıq etmişdi. Qeyd edək ki, həmin il G42, OpenAI-nin əsas investorlarından biri olan Microsoft-dan 1.5 milyard dollar investisiya almışdı.
Bununla yanaşı, BƏƏ kral ailəsinə məxsus MGX adlı investisiya qrupu da OpenAI-nin son maliyyələşmə mərhələsində iştirak edib və şirkətin "Stargate" adlı süni intellekt infrastruktur layihəsinə dəstək verməyi planlaşdırır.
OpenAI bu təşəbbüsü beynəlxalq səviyyədə süni intellekt infrastrukturunun inkişafı və "demokratik süni intellekt" konsepsiyasının təşviqi məqsədilə həyata keçirir. Bu yaxınlarda təqdim olunan “OpenAI for Countries” proqramı çərçivəsində şirkət müxtəlif ölkələrdə yerli infrastruktur quraraq süni intellekt texnologiyalarının daha geniş və effektiv şəkildə tətbiqini təmin etməyə çalışır.
Bu addım OpenAI-nin texnoloji gücünü artırmaqla yanaşı, regionda etibarlı və strateji tərəfdaşlıq əlaqələrinin möhkəmləndirilməsinə də xidmət edir. Data mərkəzlərinin qurulması həm texniki baxımdan sabitliyi təmin edəcək, həm də Yaxın Şərqdə süni intellektin inkişafında mühüm rol oynayacaq.
