OpenAI insanlara araşdırma aparmağa kömək etmək məqsədilə yeni süni intellekt aləti təqdim edib. Bu yenilik ChatGPT platformasında "Deep Research" (Dərin Araşdırma) adı ilə istifadəyə verilib.
OpenAİ tərəfindən yayımlanan blog yazısında bildirilib ki, bu funksiya maliyyə, elm, siyasət və mühəndislik sahələrində intensiv tədqiqat aparan mütəxəssislər üçün nəzərdə tutulub. Eyni zamanda, avtomobil, məişət texnikası və mebel kimi dəqiq araşdırma tələb edən ticarət sahəsində də faydalı ola biləcəyi vurğulanıb.
Deep Research istifadəçilərə sadəcə qısa cavablar təqdim etmək əvəzinə müxtəlif mənbələrdən geniş məlumat toplamaq və dərin təhlillər aparmaq imkanı verir. Bu funksiyanı ilkin mərhələdə yalnız ChatGPT Pro istifadəçilərinə təqdim edib və aylıq 100 sorğu limiti tətbiq olunub. Şirkət yaxın bir ay ərzində bu funksiyanın Plus və Team istifadəçilərinə, daha sonra isə Enterprise istifadəçilərinə təqdim olunacağını bildirib. Sorğu limitlərinin gələcəkdə artırılması da planlaşdırılır.
Deep Research xidmətindən istifadə etmək üçün istifadəçilər, ChatGPT-nin yazı yazma sahəsində ("kompozitor" adlanan hissə) "deep research" seçimini seçərək sorğularını daxil etməlidirlər. Əlavə olaraq fayllar və cədvəllər yükləmək imkanı da mövcuddur. Sorğunun nəticələri 5 ilə 30 dəqiqə arasında hazır ola bilər və hazır olduqda istifadəçilərə bildiriş göndərilir.Hazırda isə Deep Research yalnız mətn formatında cavablar təqdim edir. OpenAI gələcəkdə qrafiklər, məlumat vizuallaşdırmaları və digər analitik çıxışları əlavə etməyi planlaşdırır. Həmçinin abunə əsaslı və daxili məlumat mənbələri ilə əlaqə yaratmaq da gündəmdədir.
Süni intellekt texnologiyasının dəqiqliyi ilə bağlı suallar qalmaqdadır. OpenAI hər bir çıxışın tam sənədləşdiriləcəyini, mənbələrə aydın istinadlar veriləcəyini və düşüncə prosesinin xülasəsinin təqdim olunacağını vəd edib. Bu, istifadəçilərə təqdim olunan məlumatların doğruluğunu yoxlamaqda kömək etməyi hədəfləyir. Bununla belə, texnologiyanın bəzi hallarda səhvlərə və yanlış nəticələrə səbəb ola biləcəyi də vurğulanır.
OpenAI Deep Research funksiyasının daha düzgün işləməsi üçün xüsusi bir model olan o3 "reasoning" modelini istifadə edir. Bu model internetdəki mətnləri, şəkilləri və PDF sənədlərini təhlil etməyə, istifadəçilərin yüklədiyi faylları araşdırmağa və qrafiklər yaratmağa kömək edir. Model həmçinin, tapdığı məlumatlardan düzgün sitatlar verməyə də qadirdir.
OpenAI bu yeni texnologiyanı "Humanity’s Last Exam" adlı bir testlə sınayıb. Bu testdə 3,000-dən çox akademik sual yer alır. Deep Research funksiyası bu testdə 26.6% düzgünlük göstəricisi ilə yaxşı nəticə göstərib və digər modelləri geridə qoyub. Lakin OpenAI bu texnologiyanın bəzən səhvlər edə biləcəyini və düzgün məlumatları şayiələrdən ayırd etməyin çətin ola biləcəyini qəbul edir.
Bu yenilik tələbələrdən tutmuş mütəxəssislərə qədər geniş auditoriya üçün maraqlı və faydalı ola bilər. Lakin təqdim olunan məlumatların dəqiqliyi və etibarlılığı məsələsində istifadəçilərin ehtiyatlı yanaşması zəruridir.
