Oracle şirkəti açıqlayıb ki, onun bulud xidmətləri bölməsi İlon Maksın süni intellekt firması xAI ilə əməkdaşlıq edərək, Grok 3 adlı ən yeni süni intellekt modelini biznes müştərilərə təqdim edəcək.
Grok 3 modeli fevral ayında istifadəyə verilib və DeepSeek ilə OpenAI-nin ən son süni intellekt modellərinə rəqabət etmək məqsədi daşıyır. İlon Maks bu modeli özünün X sosial media platformasında ödənişli abunəçilərə və xAI vasitəsilə təqdim edib.
Oracle Bulud İnfrastrukturunun vitse-prezidenti Karan Batta Reuters-ə bildirib ki, Oracle Grok 3 modelini öz məlumat mərkəzlərindən korporativ istifadəçilərə təqdim edəcək. Bu, bizneslərin məlumatlarının Oracle-ın təhlükəsizlik standartları altında qorunmasını təmin edir.
Oracle həmçinin Meta, Fransız startapı Mistral və Cohere şirkətlərinin modellərini də bulud xidmətində təklif edir. Bu da Oracle-ın bizneslərin məşhur süni intellekt modellərini öz proqram təminatlarına rahat şəkildə əlavə etməsi üçün geniş seçim yaratmaq strategiyasının bir hissəsidir.
Karan Batta əlavə edib: “Bizim məqsədimiz müxtəlif süni intellekt modellərini təmin etməkdir – öz modelimiz yoxdur. Bu, hazırkı strategiyamızdır və biz bütün populyar modelləri təklif edən platforma olmaq istəyirik.”
Bu əməkdaşlıq Oracle-a korporativ müştərilərə süni intellekt imkanlarını daha rahat və təhlükəsiz şəkildə təqdim etməyə imkan verəcək.
