Süni intellektlə işləyən axtarış mühərriki Perplexity, öz süni intellekt əsaslı əməliyyat sistemini qurmaq məqsədilə “OS.ai” adlı premium domeni satın alıb.
Bu barədə domenin əvvəlki sahibi və tanınmış texnoloji investor Dharmesh Shah 13 iyul 2025-ci il tarixində LinkedIn platformasında paylaşım edərək məlumat verib. O, domenin Perplexity-nin baş direktoru Aravind Srinivasa satıldığını təsdiqləyib: “os.ai domenini @AravSrinivas-a satdım” – deyə Shah bildirib. O həmçinin qeyd edib ki, bu satışdan əvvəl də Perplexity-nin səhmdarı olub və artıq bu sövdələşmədən sonra “bir qədər daha böyük səhmdar” olduğunu bildirib. Satışın maliyyə detalları isə açıqlanmayıb.
Aravind Srinivas isə 14 iyul tarixində sosial şəbəkədə qısa və sirli bir paylaşım edərək sadəcə “os dot ai” yazıb. Bu paylaşım texnologiya ictimaiyyəti arasında böyük marağa səbəb olub, 45,000 baxış toplayaraq Perplexity-nin gələcək planları ilə bağlı müzakirələrə yol açıb.
Yeni domenin alınması Perplexity-nin süni intellekt sahəsində daha geniş vizyonunun göstəricisi kimi qiymətləndirilir.
