HR texnologiyaları sahəsində rəqib olan Rippling və Deel şirkətləri arasındakı gərginlik yeni səviyyəyə çatıb. Rippling-in keçmiş əməkdaşı Keith O’Brien Deel üçün casusluq etdiyini etiraf edib və bununla bağlı yazılı ifadə verib.
Rippling Deel-ə qarşı məhkəmə iddiası qaldıraraq, şirkəti casusluqda və kommersiya sirrlərini oğurlamaqda ittiham edib. O vaxt casusluq edən şəxsin kimliyi açıqlanmasa da, indi məlum olub ki, bu şəxs Rippling-in İrlandiya ofisində çalışan Keith O’Brien olub.
Casusluq necə baş verib?
O’Brien ifadəsində bildirib ki, 2023-cü ilin iyul ayında Rippling-in qlobal əmək haqqı və uyğunluq şöbəsində işə başlayıb. 2024-cü ilin əvvəlində Deel-də iş müsahibəsində iştirak etsə də, işə götürülməyib. Daha sonra o, LinkedIn vasitəsilə Deel-in təsisçisi və baş direktoru Alex Bouaziz ilə əlaqə yaradıb.
Bir müddət sonra O’Brien öz şəxsi əmək haqqı konsaltinq biznesini yaratmaq qərarına gəlib və bu barədə Deel-ə məlumat verib. O, Rippling-dən ayrılacağını və tamamilə öz işinə fokuslanacağını bildirib. Lakin onun sözlərinə görə, Deel-in baş direktoru Alex Bouaziz və onun atası, Deel-in maliyyə direktoru Philippe Bouaziz ona Rippling-də qalaraq onlar üçün casusluq etməyi təklif ediblər.
O’Brien-in ifadəsinə əsasən, Deel ona ayda 5,000 avro maaş ödəməyi və ilk ödənişin 6,000 dollar, sonrakı ödənişlərin isə kriptovalyuta ilə ediləcəyini vəd edib. O, Rippling-in Slack, Google Drive və digər daxili resurslarında məlumat axtarıb və əldə etdiyi məxfi informasiyanı Deel-ə göndərib.
O’Brien etiraf edib ki, Rippling-in müştəri siyahıları, məhsul planları, potensial əməkdaşlıq imkanları, satış məlumatları və digər məxfi sənədləri Deel-ə ötürüb. Rippling-in məhkəməyə təqdim etdiyi iddiaya görə, təkcə bir gündə O’Brien yüzlərlə müştəri, məhsul və satış məlumatını Deel-lə bölüşüb.
Casusun ifşası
Rippling rəhbərliyi casusu aşkar etmək üçün xüsusi bir tələ qurub. Onlar Deel-in rəhbərliyinə rəsmi məktub göndərərək Rippling əməkdaşlarının Slack-də "d-defectors" adlı bir kanalda Deel üçün utancverici ola biləcək məlumatları müzakirə etdiyini bildiriblər. Əslində isə belə bir informasiya mövcud olmayıb – məqsəd casusun kimliyini müəyyənləşdirmək olub.
O’Brien ifadəsində bildirib ki, ona həmin Slack kanalında axtarış aparmaq tapşırılıb. Qısa müddət sonra isə Deel tərəfindən bu kanalı yoxlamamağı məsləhət görüblər, çünki bunun bir tələ ola biləcəyindən şübhələniblər. Lakin artıq gec idi – Rippling onun bu kanala daxil olduğunu qeydə alıb.
Martın 14-də O’Brien işə gələndə Rippling-in hüquqşünasları ona yaxınlaşıb və onun cihazlarını yoxlamaq üçün məhkəmə qərarını təqdim ediblər. O, laptopunu təhvil versə də, telefonunu gizlədərək tualetə keçib və cihazını zavod parametrlərinə qaytarıb. Daha sonra telefonunu unitaza atmış kimi göstərsə də, sonradan etiraf edib ki, köhnə telefonunu balta ilə sındıraraq qayınanasının evində kanalizasiya borusuna atıb.
O’Brien panikaya düşdüyünü və Deel-in rəhbərliyi ilə əlaqə saxladığını bildirib. Onlar ona Dubaya qaçmağı təklif ediblər, çünki Dubaydan ABŞ-a ekstradisiya çətin ola bilərdi. Həmçinin, ona Rippling-in guya Rusiyaya qanunsuz ödənişlər etdiyini və özünü "whistleblower" (məlumat sızdıran) kimi təqdim etməyi məsləhət görüblər. Lakin O’Brien bu iddiaların yalan olduğunu anlayaraq hüquq-mühafizə orqanları ilə əməkdaşlıq etməyə qərar verib.
Deel-in cavabı
Deel, Rippling-in ittihamlarını qəti şəkildə rədd edib. Şirkət TechCrunch-a verdiyi açıqlamada bildirib ki, Rippling bu iddiaları ortaya atmaqla diqqəti yayındırmağa çalışır. Deel-in sözçüsü deyib:
"Rippling Rusiyaya qarşı sanksiyaları pozmaqda ittiham edilir və Deel haqqında yalan məlumatlar yaymaqda suçlanır. İndi isə bu ittihamlarla gündəmi dəyişməyə çalışır. Biz bütün hüquqi ittihamları rədd edirik və öz müdafiəmizi aparmağa hazırıq.”
Buna baxmayaraq, Rippling-in hüquqşünası Alex Spiro təqdim edilən sübutların danılmaz olduğunu bildirib:
"Bu hadisə, Deel-in rəhbərliyinin casusluq sxeminə necə qarışdığını açıq şəkildə göstərir. Onlar cavab verməli olacaqlar."
HR texnologiyaları sahəsindəki digər şirkətlər də bu qalmaqala reaksiya verib. Deel-in rəqibi Papaya Global-ın CEO-su Eynat Guez bu hadisə ilə bağlı paylaşım edərək bildirib:
"Bildiyimiz qədər, bu, təkcə bu hadisə ilə məhdudlaşmır. @parkerconrad təşəbbüs göstərdiyinə və bu praktikanı ifşa etdiyinə görə təşəkkür edirik.”
Bu qalmaqal HR texnologiyaları sahəsindəki iki əsas rəqibin mübarizəsinin nə qədər kəskinləşdiyini göstərir. Hazırda məhkəmə prosesi davam edir və Deel-in bu ittihamlara qarşı necə müdafiə edəcəyi böyük maraq doğurur.
