OnePlus şirkəti yeni OnePlus Watch 3 ağıllı saatının satışını bir aydan çox müddətə təxirə salıb. Səbəb isə saatın arxa hissəsindəki yazı səhvidir.
Cihazın bu günlərdə satışa çıxması planlaşdırılmışdı, lakin erkən baxışlar zamanı saatın alt hissəsində "Made in China" (Çində istehsal olunub) əvəzinə "Meda in China" yazıldığı aşkar edilib. Bu səhv səbəbindən OnePlus saatın buraxılışını 2025-ci ilin aprel ayına qədər gecikdirməyə qərar verib.
Şirkət əvvəlcə müştərilərə saatı geri qaytarmaq və ya səhv yazılı versiyanı unikal kolleksiya əşyası kimi saxlamaq imkanı təklif edib. Lakin daha sonra bu səhvi düzəltmək üçün yeni partiya istehsal ediləcəyini və satış tarixinin dəyişdirildiyini açıqlayıb.
OnePlus-un verdiyi məlumata görə, saatın yeni buraxılışı aprel ayında olacaq. Dəqiq tarix bildirilməsə də, ABŞ-dakı sifariş səhifəsində prioritet çatdırılma üçün 15 aprel, standart çatdırılma üçün isə 16 aprel göstərilib. OnePlus ön sifarişləri aprel ayına qədər açıq saxlayacaq. Bu müddətdə xüsusi endirimlər qüvvədə olacaq. Məsələn, ABŞ-da olan alıcılar "TIME1010" kodundan istifadə edərək 30 dollar endirim əldə edə bilər, tələbələr isə əlavə 10% endirimdən yararlana bilər. OnePlus Watch 3-ün rəsmi satış qiyməti 329,99 dollar olaraq elan edilib.
