Starlink Braziliyada mobil operator Vivo ilə əməkdaşlıq çərçivəsində birbaşa peyk bağlantısı xidmətini istifadəyə verib. Yeni xidmət mobil şəbəkənin olmadığı ərazilərdə təxminən 50 milyon Vivo müştərisinə mesajlaşma və müəyyən tətbiqlərdən istifadə imkanı yaradacaq. Artıq 7 milyon smartfon sistemə qoşulub.
Xidmət Braziliyanın ucqar ərazilərini, o cümlədən tropik meşələri, balıqçı yaşayış məntəqələrini və uzun avtomobil yollarını əhatə etməyi hədəfləyir.
Adi peyk internetindən fərqli olaraq, Starlink Mobile-ın Direct to Cell texnologiyası uyğun smartfonların əlavə antenaya ehtiyac olmadan birbaşa peyklərlə əlaqə qurmasına imkan verir. Bu sistemdə peyklər orbitdəki mobil baza stansiyaları kimi fəaliyyət göstərərək yerüstü rabitə infrastrukturu olmayan ərazilərdə əlaqəni təmin edir.
Starlink — SpaceX şirkətinin aşağı Yer orbitindəki peyklər vasitəsilə internet bağlantısı təqdim edən qlobal peyk şəbəkəsidir. 2026-cı ilin oktyabr ayının sonuna olan məlumata görə, orbitdə təxminən 11 170 Starlink peyki olub və onların 11 150-dən çoxu fəaliyyət göstərib. Şirkət peyk qruplaşmasını genişləndirməyə və mobil cihazların birbaşa peyklərə qoşulması texnologiyasını inkişaf etdirməyə davam edir.
Gələcəkdə V2 nəsil peyklərin Starlink Mobile xidmətinin ötürmə qabiliyyətini artıracağı gözlənilir. Bu, məhdud mesajlaşma imkanlarından daha sürətli mobil internetə keçidi mümkün edə bilər.
