Kriptovalyuta birjası Bybit tarixdə ən böyük kiberhücuma məruz qalıb və hakerlər təxminən 1,5 milyard dollar dəyərində rəqəmsal valyutanı ələ keçiriblər. Blokçeyn analitik şirkəti Elliptic-in məlumatına görə, bu, indiyə qədər qeydə alınmış ən böyük kriptovalyuta oğurluğudur və əvvəlki oxşar hadisələri geridə qoyur.
Hakerlər əsasən ether olmaqla milyonlarla dollar dəyərində rəqəmsal valyutanı Bybit-in internetə qoşulu olmayan xüsusi saxlanma sistemindən oğurlayıblar. Belə sistemlər adətən təhlükəsiz hesab olunsa da, bu dəfə kiberhücumçular mühafizə tədbirlərini aşaraq oradan vəsaitləri çıxarmağa nail olublar. Bybit-in rəhbəri Ben Zhou sosial şəbəkədə paylaşım edərək digər saxlanma sistemlərinin təhlükəsiz olduğunu və istifadəçilərin vəsaitlərini geri çəkmək üçün heç bir maneə ilə üzləşmədiyini bildirib.
Elliptic və Arkham Intelligence şirkətlərinin araşdırmalarına görə, oğurlanan pullar müxtəlif hesablar arasında paylanıb və müxtəlif platformalar vasitəsilə tez bir zamanda satılıb. Analitiklər bildirir ki, bu hücum 2021-ci ildə Poly Network-dən oğurlanan 611 milyon dollar və 2022-ci ildə Binance-dən oğurlanan 570 milyon dollarlıq hadisələri xeyli geridə qoyur.
Elliptic-in araşdırmalarına əsasən, hücumun arxasında Şimali Koreyanın dövlət tərəfindən dəstəklənən Lazarus qrupu dayanır. Bu qrup 2017-ci ildən bəri müxtəlif kriptovalyuta platformalarına hücum edərək milyardlarla dollar oğurlayıb. Hakerlər çətin izlənən üsullardan istifadə edərək vəsaitlərin haraya köçürüldüyünü gizlətməyə çalışırlar və əsas məqsədləri Şimali Koreyanın maliyyələşdirilməsinə kömək etməkdir.
Elliptic-in baş analitiki Tom Robinson bildirib ki, oğurlanan vəsaitlərin başqa platformalar vasitəsilə çıxarılmasının qarşısını almaq üçün həmin hesablar xüsusi proqram təminatında işarələnib.
Haker hücumu ilə bağlı xəbərlər yayıldıqdan sonra Bybit istifadəçiləri kütləvi şəkildə pullarını platformadan çıxarmağa başlayıblar. Ben Zhou panikanın qarşısını almaq üçün Bybit-in tərəfdaşlarından biri ilə razılaşaraq əlavə maliyyə dəstəyi aldıqlarını və itkilərin ödənilməsi üçün kredit götürdüklərini açıqlayıb.
Ekspertlər hesab edirlər ki, bu tip hücumlar kriptovalyuta bazarının əsas risklərindən biridir və təhlükəsizlik tədbirləri gücləndirilmədiyi müddətcə belə hadisələrin baş verməsi qaçılmazdır. Tom Robinson isə bildirib ki, cinayətkarların oğurladıqları vəsaitlərdən istifadə etməsini çətinləşdirmək bu tip hücumların azalmasına kömək edə bilər.
