xAI şirkəti İlon Maskın rəhbərliyi ilə bu ilin fevral ayında təqdim etdiyi Grok 3 modelinin API versiyasını istifadəyə verdiyini elan edib. İstifadəçilərə həm Grok 3, həm də onun daha yüngül versiyası olan Grok 3 Mini təqdim olunur.
API (Application Programming Interface) – proqram təminatlarının bir-biri ilə əlaqə qurmasına imkan verən texnologiyadır. Grok 3 modeli məntiqi düşünmə, təhlil etmə və vizual məlumatları emal etmə bacarıqları ilə seçilir. Model, təbii dildə verilmiş suallara cavab vermək və sosial media platforması X-də (əvvəlki Twitter) müxtəlif funksiyaları dəstəkləmə imkanlarına malikdir.
xAI mart ayında X platformasını 33 milyard dollar dəyərində satın almaqla Grok modelini platformaya daha dərindən inteqrasiya etməyi qarşısına məqsəd qoyub. Şirkət bu modellər üçün ayrıca qiymət siyasəti tətbiq edir. Grok 3 modeli üçün 1 milyon giriş tokeninə görə 3 dollar, çıxış tokeninə görə isə 15 dollar müəyyən edilib. Sürətli versiyada bu qiymətlər 5 və 25 dollar arasında dəyişir. Daha münasib alternativ olan Grok 3 Mini isə giriş üçün 30 sent, çıxış üçün isə 50 sent qiymətindədir. Onun sürətli versiyası isə 60 sent və 4 dollar səviyyəsindədir.
xAI-ın təqdim etdiyi qiymətlər Anthropic şirkətinin Claude 3.5 Sonnet modeli ilə uyğun olsa da, Google-un Gemini 2.5 Pro modeli ilə müqayisədə daha yüksəkdir. İlkin test nəticələri Grok 3 modelinin performans baxımından Gemini 2.5 Pro-dan geri qaldığını göstərir.
Modelin API üzərindən dəstəklədiyi bağlam pəncərəsi də nəzərəçarpacaqdır. Teoridə 1 milyon token emal edə bildiyi iddia olunsa da, API versiyası yalnız 131.072 token (təxminən 97.500 söz) ilə məhdudlaşır.
Grok modelləri ilk gündən senzurasız və sərbəst cavablar verən süni intellekt olaraq tanıdılıb. Əvvəlki versiyalar istifadəçilərin istəyindən asılı olaraq kobud və sərt ifadələr təqdim edə bilsə də, bu sərbəstlik siyasət və sosial məsələlərdə qismən məhdud idi. Araşdırmalar göstərib ki, Grok modelləri sol yönümlü cavablar verməyə meyllidir. İlon Mask bu vəziyyəti modelin açıq veb məlumatları əsasında öyrədilməsi ilə əlaqələndirib və məqsədlərinin siyasi cəhətdən neytral süni intellekt hazırlamaq olduğunu bildirib. Grok 3 modelinin bu hədəfə nə dərəcədə yaxınlaşdığı isə hələ də dəqiq bilinmir.
xAI şirkəti hazırda aqressiv qiymət strategiyası və ideoloji mövqeyi ilə bazarda fərqlənməyə çalışır. Lakin texniki məhdudiyyətlər və rəqabətli mühit bu strategiyanın uğurunu sual altında qoyur.
