"Business Insider" nəşrinin məlumatına görə, xAI məlumatların təsnifatı ilə məşğul olan komandadan ən azı 500 nəfəri işdən azad edib. İşçilərə cümə günü elektron poçt vasitəsilə bu barədə məlumat verilib.
İşdən çıxarılan bu şəxslər "ümumi süni intellekt təlimatçıları" kimi tanınan komandanın üzvləri idi. Onların əsas vəzifəsi xam məlumatları emal edərək "Grok"un dünyanı daha yaxşı anlamasına kömək etmək idi.
Şirkət, müqavilə müddətinin sonuna qədər və ya ən geci 30 noyabra qədər işçilərin maaşlarının ödəniləcəyini bildirsə də, ixtisar xəbərindən dərhal sonra onların şirkət sistemlərinə girişi məhdudlaşdırılıb.
Bu ixtisarlar, şirkətin strateji addımları ilə bağlı bəzi suallar doğurur. Belə ki, xAI bu ixtisarlara dair şərhlərə cavab olaraq sosial şəbəkədəki paylaşımına istinad edib. Həmin paylaşımda şirkətin digər sahələrə işçi qəbulunu davam etdirdiyi və mütəxəssis süni intellekt təlimatçılarının sayını 10 dəfə artırmağı planlaşdırdığı qeyd olunur.
Bu hadisə, həmçinin şirkətin maliyyə direktoru Mayk Liberatorun cəmi bir neçə ay işlədikdən sonra iyul ayında vəzifəsindən ayrılmasından sonra baş verib. Bu barədə ilk məlumat "Wall Street Journal" tərəfindən yayılmışdı.
