WhatsApp-ın Android beta versiyasında istifadəçilərə status yeniləmələri vasitəsilə səsli qeydləri paylaşmağa imkan verən yeni "audio status" funksiyasını istifadəyə verdiyi bildirilir. WABetaInfo-nun açıqladığı məlumata görə, beta istifadəçiləri indi status bölməsindəki yeni funksiyaya daxil olaraq səsli qeydləri status kimi paylaşa bilərlər.
Platforma həmçinin istifadəçilərə səs yazılarını paylaşmazdan əvvəl silmək imkanı təklif edərək, istifadəçilərə öz səs yazılarına daha çox nəzarət etmək imkanı verir. Səsli qeyd üçün maksimum qeyd müddəti 30 saniyə müəyyən edilib. Bundan əlavə, şəkillər və videolar kimi status vasitəsilə paylaşılan səslər 24 saatdan sonra yox olacaq.
Həmçinin bu səslər başdan-başa şifrələnir ki, yalnız məxfilik parametrlərində seçdikləri adamlar onları dinləyə bilsin. Onu da nəzərinizə çatdıraq ki, yeni funksiyanın yaxın həftələrdə daha çox istifadəçi üçün əlçatan olacağı bildirilib.
