Ağ Ev ABŞ-da kənd təsərrüfatı siyasətinə dair yeni “OnlyFarms” adlı vebsaytı istifadəyə verib. Rəsmi platformada yerləşdirilən sayt fermerlər üçün nəzərdə tutulan iqtisadi dəstək tədbirləri haqqında məlumat təqdim edir.
27 mart tarixində təqdim olunan platformada vergi güzəştləri, maliyyə yardımları və fermerlərin bazarlara çıxış imkanlarının genişləndirilməsi kimi təşəbbüslər yer alır. Saytda həmçinin interaktiv xəritə vasitəsilə müxtəlif ştatlar üzrə fermerlərin potensial qənaətlərini hesablamaq mümkündür.
Administrasiya kənd təsərrüfatı sektoruna 40 milyard dollardan çox birbaşa dəstək göstərildiyini bildirir və bu addımın fermerlərin mövcud iqtisadi çətinliklərə uyğunlaşmasına kömək etməyi hədəflədiyini vurğulayır.
Bununla yanaşı, saytın adı sosial mediada geniş müzakirələrə səbəb olub. Bir çox istifadəçi “OnlyFarms” adının məşhur “OnlyFans” platformasını xatırlatdığını qeyd edərək, belə bir ad seçiminin məqsədəuyğunluğunu sual altına alıb.
Saytın təqdim olunduğu gün Vaşinqtonda yüzlərlə fermerin iştirakı ilə tədbir keçirilib. Tədbirdə çıxış edən ABŞ prezidenti bu görüşü Ağ Ev tarixində fermerlərin ən böyük toplaşmalarından biri kimi qiymətləndirib və onların ölkə üçün əhəmiyyətini vurğulayıb.
