Alibaba və Baidu – süni intellekt (AI) sistemlərini hazırlamaq üçün artıq Nvidia-nın çipləri ilə yanaşı, özlərinin istehsal etdiyi çiplərdən də istifadə etməyə başlayıblar. Bu, süni intellekt bazarında lider olan ABŞ-ın Nvidia şirkəti üçün güclü bir rəqib deməkdir.
"The Information" xəbər saytı bildirir ki:
Alibaba bu ildən etibarən kiçik süni intellekt modellərini öz çipləri ilə öyrədir. Məlumata görə, bu yeni çip Nvidia-nın Çinə ixrac edə bildiyi ən güclü çip olan H20 ilə rəqabət apara biləcək səviyyədədir.
Baidu isə "Ernie" adlı süni intellekt proqramı üçün özünün "Kunlun P800" çipini sınaqdan keçirir.
Hər iki şirkət hələlik ən mürəkkəb işlər üçün Nvidia-nın çiplərindən istifadə etsə də, bu addım Çinin xarici texnologiyalardan asılılığını azaltmaq məqsədi daşıyır. ABŞ hökuməti Çinə yüksək güclü süni intellekt çiplərinin satışına məhdudiyyətlər qoyduğu üçün, Çin şirkətləri yerli istehsalı artırmağa məcbur olurlar.
Nvidia isə Çin bazarını itirməmək üçün daha az güclü çiplər təklif edir. Lakin rəqabətin getdikcə artdığını etiraf edir və Nvidia-nın baş direktoru Jensen Huang bu məhdudiyyətlərin yüngülləşdirilməsi üçün ABŞ hökuməti ilə danışıqların davam etdiyini bildirir.
Nvidia-nın sözçüsü bu barədə belə deyib: "Rəqabət artıq inkar edilməzdir. Biz dünyanın hər yerində developerlərin etimadını qazanmağa davam edəcəyik."
